Tegere mit Stichting Kunstwerf orgeniseerde de Stellingwarver Schrieversronte op 23 oktober een streekkulturele aovend in hotel-resteraant De Zon in Oosterwoolde. Naodat Theo van Gilst, hi’j is veurzitter van Stichting Kunstwerf, de aovend eupend hadde, vertelde streekkenner Geert Lantinga van Wolvege veur et schoft over de vroege geschiedenis van Stellingwarf tot de periode dat de eerste dörpen ontstaon binnen. Veur veul meensken bleek dat aorig wat gegevens daor Lantinga over vertelde an now toe bi’j heur onbekend weren. Zo was et bi’j de meerste bezukers an de aovend niet bekend dat hiel lange leden de Rijn niet naor et westen toe stroomde mar naor et noorden en dus ok deur et Stellingwarver gebied. Nao et schoft vertelde Klaasje Herder van Oosterwoolde op kundige, beeldende wieze volksverhaelen van Wube Lamers van de Kuunderwal. Van die unieke volksverhaeleverteller (1912-2001) uut Berkoop gaf de Stellingwarver Schrieversronte eertieds et boek ‘Mien wegen bin duustere paeden’ uut waor al die prachtige verhaelen in opneumen binnen. Tussen ‘Starke Garke’, ‘De laete zwelver’ en ‘Et verhael van de Pietermannen’ deur vertelde taelkundige dr. Henk Bloemhoff, ok van Oosterwoolde, wat meer over de aachtergronden van volksverhaelen en over de verschillende onderzuken die daor daon binnen en over de wieze waorop. Op disse aovend kwam flink wat volk of, dat allemaole biezunder van et ofwisselende streekkulturele pergramme geneuten het. Schrieversronteveurzitter Ype Dijkstra sleut de aovend daoromme of mit o.e. et veurstel om in de toekomst nog es weer zoe’n gezaemelike streekaovend te orgeniseren.
Foto’s: Lenus van der Broek