(Foto’s: Lenus v.d. Broek)
Veur de Kring van Bercoop verzorgde de Stellingwarver Schrieversronte maendagaovend in et Victoriapark in Wolvege een Stellingwarver aovend. Veurzitter Sjoerd Stienstra kon roem 150 leden van de Kring welkom hieten an et begin van de aovend die ommeraek in de smaek valen zol. Veur et schoft leuten Jan Koops (Oosterwoolde) en Jan de Vries (Wolvege) een prissentaosie zien van oolde foto’s en prentbriefkaorten uut et kerngebied van de Kring van Bercoop; dat is zoe’n betien et middengebied van Stellingwarf. In de prissentaosie was butendat een twietal oolde filmpies opneumen. Et iene leut beelden zien van de tram zoas die vroeger deur et gebied gong, et ere beelden van lessen rietvlechten in Noordwoolde. Nao et schoft vertelde Schrieversronte-direkteur Sietske Bloemhoff over et wark van de stichting en dan mit naeme over de verni’jde koers van de laeste jaoren. Daornao wodde de CAV-film van Berkoop dri’jd, die film wodde in 1957 opneumen bi’j gelegenhied van de eupening van de ni’je CAV-febriek in dat dörp. De 38 menuten durende film geft een prachtig beeld over et boereleven in Stellingwarf in die tied. An et aende van de aovend maekte veurzitter Stienstra bekend dat Kring van Bercoop een flinke donaosie an de Schrieversronte schinken zal vanwegens et verzorgen van disse slim slaegde aovend. De Kring van Bercoop ondersteunt in zien kerngebied aktiviteiten van orgenisaosies of instellings die van algemien belang binnen.