Vri’jdagaovend 14 feberwaori was de prachtige Stellingwarver patchworkrok, bestaonde uut 14.400,- lappies, nog ienkeer te zien. Dat was in de Grote Karke in Liwwadden, bi’j de ofsluting van Under de Toer: neffens veul meensken et meerst suksesvolle LF 2018-projekt. De rok was onderdiel van De Verdwenen Peerden, iene van de 31 manifestaosies van UdT. Van alle ni’jsters an de rok weren d’r vier vrouwluden mit. Uteraord dreug de smid uut et verhael, Geert Popkema van Noordwoolde, de prachtige rok, en was ok ontwarpster en artisiek leider Mariken Biegman d’r bi’j, krek as projektleider Sietske Bloemhoff van de Stellingwarver Schrieversronte.
De aovend wodde prissenteerd deur Jos Thie en Tamara Schoppert. An et aende van de aovend wodde een boek prissenteerd daor alle 31 manifestaosies kot in beschreven binnen. De orgenisaosie hadde veur alle 31 manifestaosie 30 exemplaoren beschikber steld.
