Mit de sutelaktie gaot et poerbest!

door

Nao vier suteldaegen dot wel blieken dat et mit de sutelaktie dit jaor hiel goed gaot. Mit mekeer verkochten de sutelders al veur € 6.700,- an boeken, kelenders en cd’s. Toppers in de verkoop bin de spreukekelender en et boek over de Stellingwarver gemientewaopens, mar ok et zowat uutverkochte boek ‘De Friese Waterlinie’ dot et best. Ok et anbod van de drie Lenderoutegidsen veur € 20,00 bliekt een schot in de roze.

D’r wodt dit jaor nog suteld op woensdag 20 september en maendag 25 september, daornao verdwienen de krojen weer veur zowat een jaor naor de zoolder van et SSR-gebouw.

141. Klaover drie

door

  

Dit huus an de Idzardaweg op Der Izzerd het de naeme klaover drie. Hier het de femilie Bruinsma een hattehoolderi’je. Aj’m dus graeg hattevleis hebben willen kuj’m dat hier bezetten. (Foto’s en tekst: Johan Veenstra)

140. Oons hoekien

door

  

Stellingwarfs in et ‘wild’ komt ok veur op ‘e Langelille. Dat zag Annie Dedden doe ze een fietstochien in de omgeving van dat kleine dörpien in de Westhoek zag. De kiender hebben daor een eigen speulplak mit de Stellingwarver naeme ‘Oons hoekien’.

Opni’j filmopnaemen bi’j Stellingwarver Schrieversronte

door

  

Zaoterdag 16 september wodden d’r bi’j de Schrieversronte opni’j filmopnaemen maekt. Now veur een promosiefilmpien Stellingwarfs t.b.v. een warkwinkel tael-meziek binnen et vak Hiemkunde et basisonderwies. Annemieke Jager (12) uut Berkoop vertelt daorin o.e. over mooie Stellingwarver woorden zoas ‘babbelegoegies’. Kameraman was Patrick Hoving (rechts, student Minerva Grunningen), regieassistent was Bas van Domburg (theaterman en muzikaant, Diever).

Aovend mit Ferdinand de Jong en Klaas Dijkstra

door

  

Ferdinand de Jong (links, eigen foto) en Klaas Dijkstra (foto: Sietske Bloemhoff) zorgen tegere veur de vuufde gezaemelike literaire aovend Schrieversronte en Fryske Krite Oosterwoolde

Op vri’jdag 22 september is d’r in De Miente in Oosterwoolde de jaorlikse literair-kulturele aovend van de Stellingwarver Schrieversronte en de Fryske Krite van Oosterwoolde. Dit keer komt vanuut de Friese hoeke schriever Ferdinand de Jong uut Drachten veurlezen en vertellen uut eigen wark. Veur de Stellingwarver inbreng zorgt Klaas Dijkstra van Langedieke; hi’j zal verhaelen veurlezen uut et boek ‘Daegelikse dinkies’ van Klaas van der Weg (1915 – 1995) uut Ni’jtriene.

De gezaemelike aovend, die alweer veur de vuufde keer holen wodt, is de ofsluting van de Stellingwarver sutelaktie en de Friese boekemaond en voldot alle keren bi’j et pebliek ommeraek goed.

De aovend begint om 20.00 ure. De toegangspries is veur leden van de Krite en de Schrieversronte € 6,00, eren betaelen € 7,50.