Jong van hatte mit et Stellingwarfs de toekomst in
Steginge is een buurtschop die dichter bi’j et dörp lag as Nanninge en Praninge. Ie vienen d’r vandaege-de-dag liekewel mar weinig van weeromme. Alliend de straotnaeme Stegingeweg dot nog an de buurtschop daenken. De boerderi’je Steginge lag tussen de Stegingeweg en de Boereweide. De infermaosiebodden wodden indertied deur de Historische Verieninge van Oosterwoolde ontwikkeld en plaetst, in saemenwarking mit de Stellingwarver Schrieversronte. (Foto en tekst: Sietske Bloemhoff)
De buurtschop Praninge lag op et plak daor aj’ now Oosterwoolde uutrieden op de Praningeweg, richting Donkerbroek. De boerderi’je mit de naeme van de buurtschop staot daor nog, links van de weg. Praninge en Nanninge hadden elk twie stemdregende boerderi’jen, zo is op et infermaosiebod te lezen dat vlakbi’j de boerderi’je Nanninge staot. Om 1800 henne bin die van Nanninge verplaetst. Iene kwam an de noordkaante en iene an de zuudkaante an de Nanningesluus of et Nanningeverlaot, dat d’r in 1815 kommen is. (Foto en tekst: Sietske Bloemhoff)
Intied bin drie buurtschoppen van Oosterwoolde zo goed as opslokt deur de ni’jbouw in et westelike pat. Iene daorvan is Nanninge; dat was indertied een kleine buurtschop bi’j de boerderi’je mit dezelde naeme (boverste foto). De boerderi’je is nog et ienige dat van de buurtschop overbleven is. In vroeger jaoren leup d’r een fietspad bi’j langes dat vanof Nanningesluus naor et dörp leup. Omreden de drie buurtschoppen zo dichte bi’j mekere liggen is indertied in Nanninge een bod plaetst mit alledrie de naemen. (Foto’s en tekst: Sietske Bloemhoff)
Naodat op 24 oktober ’Et Fochtelervene – van Iestied naor Wieshied’ op RTV Drenthe te zien was, zal de een ure durende dokementaore over et Fochtelervene op 1 jannewaori op Omroep Frieslaand uutzunnen wodden. Dat gebeurt dan mar liefst drie keer: morgens om negen, tien en elf ure.
Van alle aspekten die mit et Fochtelervene te maeken hadden, of nog hebben, het de stichting Stellingwarver Schrieversronte disse verhaelende dokementaire produceerd. Hoe ontston et gebied, wie woonden d’r, hoe leefden de meensken mit en op et vene en wat veraanderde d’r deur de jaoren henne. Mit disse briede opzet lat de SSR zien wat et Fochtelervene deur de ieuwen henne west is: van oergebied tot van levensbelang veur de bewoners, tot et netuurgebied van vandaege-de-dag. Antrekkelik veur de meensken in de buurt en veur bezukers van heinde en veer.
Ontstaons- en laandschopsgeschiedenis
In de film is d’r veul ommedaenken veur de ontstaons- en laandschopsgeschiedenis van et gebied. Mit naeme dr. Roy van Beek (archeoloog) en Cindy Quik (fysisch geograaf) vertellen daor over. Beide bin verbunnen an de WUR (Wageningen University & Research). Laandschopshistorikus drs. Dennis Worst van Else gaot uutgebreid in over de biezundere laandschopsgeschiedenis van et Fochtelervene.
Natuurmonumenten
Netuurlik komt in de dokementaire ok Natuurmonumenten, de beheerder van et Fochtelervene, an et woord. Koördinater en boswaachter Martin Snip vertelt over de beheerplannen veur now en laeter, mar ok over de laandschoppelike weerde van et Fochtelervene in saemenhang mit de laandelike gebieden d’r ommetoe.
Historikus en filmmaker Thomas Rovers
Veur et schrieven van et verhael en et opnemen en regisseren van ‘Et Fochtelervene – van Iestied naor Wieshied’ zorgde historikus en filmmaeker Thomas Rovers uut Grunningen. De produktie was in hanen van Sietske Bloemhoff.