De buurtschop De Weper was altied iene van de mooiste buurtschoppen om Oosterwoolde henne. Et gong om een zonuumde kernesnederzetting, mit vier boerderi’jen om een mandielige brink henne, bouwlanen op de es, en hujlanen bi’j ’t Grootdiep. Zo was et, want vandaege-de-dag is d’r weinig over van de buurtschop, die zokke dudelike Drentse trekkies hadde. (Foto en tekst: Sietske Bloemhoff)

Op et verkiezings-anplakbiljet van WB staot de Stellingwarver tekst De kop d’r veur. Zie nommer 331 van disse serie. Hier een foto die op et ogenblik om een lanteernpaol in Ni’jhooltpae hangt van de poletieke perti’j Blijf Stellingwarfs. De naeme van die perti’j is dus half in et Stellingwarfs. Et was mooier west as et Blief Stellingwarfs west was. Mar… et begin is d’r! (Foto en tekst: Johan Veenstra)

In Oosterwoolde kregen in een hiele wiek de straoten indertied historische naemen. Et gaot om zonuumde veldnaemen, en in dit geval van maoden. Maoden bin hoeken grös- en mit naeme hujlaand; et woord wodde daor eertieds in hiel Stellingwarf veur bruukt. Spietig genoeg wodde bi’j de straotnaemen in Oosterwoolde ‘maod’ vertaeld in et Nederlaans, mar in een peer naemen is et eerste diel in et Stellingwarfs anholen. Zoas in dit geval in Leegemaad, al hadde dat vanzels gewoon Legemaad wezen moeten… ‘Lege’ dudet hier op ‘laag gelegen’, en niet, zoas wel es docht wodt, op et Nederlaanse ‘leeg’. (Foto en tekst: Sietske Bloemhoff)

Hier rust mien lieve breur

De tekst op ’e grafstien van Wiebe Hulzinga op et karkhof van Ni’jhooltpae is in et Stellingwarfs. Et is ien van de vier grafstienen op et hof van Ni’jhooltpae die in et Stellingwarfs binnen. (Foto en tekst: Johan Veenstra)

Et is van ’t jaor al weer 26 jaor leden dat mien moeder wegraekte. Beeldhouwer Hans van Coevorden het heur grafstien maekt mit daorop de tekst in et Stellingwarfs. Mit ok de zin Genegenhied gaf oonze daegen kleur uut mien gedicht Zwatte kammeraod. Dat gedicht staot in de bundel Sletel parredies uut 1994. Et was indertied de eerste Stellingwarfstaelige grafstien op et karkhof van Ni’jhooltpae. Was et ok de eerste in de Stellingwarven? Now bin d’r al vier Stellingwarfstaelige grafstienen op et hof van Ni’jhooltpae. Op et karkhof van Wolvege is d’r ok iene. Weten jim d’r nog meer? Laot oons dat weten!

NB: Foto’s wo’n alliend plaetst mit goedvienen van de femilie.