Dit opschrift is zo dudelik as wat. D’r bin een hiele protte broggen en broggies in Gieteren, mar dit is echt de laeste brogge an ’t Binnenpad. Hier bi’j oons komt zowel laest as lest veur. Et Stellingwarfs Woordeboek geft bi’jveurbeeld de woorden laestdaegs en lestdaegs. Bi’j et woord brogge doen we hier gien kappien op ’e letter o. Mar dat bin mar kleinigheden. Mooi dat et zo op et bottien staot. (Foto’s en tekst: Johan Veenstra)

Veurhuus is de naeme van ien van de drie appattementen in de Hartman Hoeve an de Langesteeg in et mooie Gieteren. (Foto’s en tekst: Johan Veenstra)

As nommer 128 in disse serie komt Broggepop veur, een meziekfestival op ’e Hoeve. Blesdieke wil vanzels niks minder wezen. Daor hebben ze Pollepop. Et woord polle komt vaeker in disse serie veur zoas de straotnaeme De Polle in Wolvege (109), Meulepolle, de naeme van een huus in Hooltpae (75) en… et kefé van Blesdieke hiet De Polle (98). Dan is de cirkel weer rond. Bi’j et woord polle zuwwe hier vermoedelik daenken moeten an een kleine boerderi’je of een flink stok laand. Veurbeeldzin: Et is een huus mit een beste polle laand. (Foto en tekst: Johan Veenstra)

An de Hamersweg in Hooltpae het Alfred Plat een bouwbedrief. Op et prachtige toegangshekke staot tussen de ofbeelding van twie haemers: De Platte. (Foto’s en tekst: Johan Veenstra)