Een disko veur kiender in Blesdieke hiet Pollepopkids. Pollepop, veur de grote meensken, komt in disse serie veur as nommer 344. Waoromme bruken meensken in hemelsnaeme dat vreselike woord kids toch? Now ja, we zullen mar zeggen dat smaeken verschillen. Ik gao ongetwiefeld niet mit de tied mit! Bi’j et woord polle zuwwe vermoedelik daenken moeten an een boerderi’je of een flink stok laand; zie ok nommer 344. (Foto en tekst: Johan Veenstra)

Ik fietse alle zoemers wel een peer keer over de Heerlikhied De Eese naor Frederiksoord en dan kom ik deur et dörp Ni’jesliek. Daor zag ik et bod mit Stichting Veuruut d’r op. Et is een stichting die meensken an et wark perbeert te kriegen via leerwarktrejekten. (Foto en tekst: Johan Veenstra)

In april wodde bi’j et Stokersverlaot in Appelsche een biezunder monement onthuld. Et is onderdiel van de zonuumde Liberation Route, een herdaenkingsroute angaonde de Twiede Wereldoorlog. In Appelsche zorgde de Historische Veriening veur dit monement. Op et bod is in vier taelen, waoronder et Stellingwarfs, et volgende te lezen:

Tiedens de Twiede Wereldoorlog ston Frieslaand d‘r omme bekend dat et een rustige perveensie en goed onderduukparredies was. Mar ok hier was spraoke van geweld, verzet, verraod, vervolging, verwoestings en wodden meensken doodscheuten. Nao de lochtlaandingsopperaosie Armherst kwam in Zuudoost-Frieslaand de bevri’jding op gang. In de naacht van 7 op 8 april laanden hier zoe’n 700 Fraanse parresjutisten. Een tal kwam terechte op ’e greens tussen Drenthe en Frieslaand, in de buurt van Appelsche.

(Foto’s en gegevens: Akkie Zeilstra)