Et woord bliede kommen we wel es vaeker tegen in disse serie. En now ok op ‘e greens van De Blesse en Willemsoord. Henk Jager maekte kotleden disse foto.

De Koele is de naeme van et eupenlochttheater in Appelsche. Een foto daorvan plaetsten we al onder nommer 119 van disse serie. Mar… aj’ weer votgaon ziej’ op ‘e toegangspoort een ere mooie tekst in et Stellingwarfs: Mooi da’j west bin’n – gauw weer komm’n. Hiel spietig bin dan vanzels wel de taelfouten die as maekt binnen, et zol Mooi daj’ west binnen – gauw weer kommen wezen moeten. Mar wie wet past de Historische Verieninge van Appelsche die nog es an! Want dat verdient zoe’n mooi initiatief. (Foto: Hans Salverda)

Tiedens et jubileumfeest van de Stellingwarver Schrieversronte op 25 juni in De Koele in Appelsche was op et Dichterspad een diel van een kienderlietien te lezen. De tekst van We gaon now op vekaansie is van Sietske Bloemhoff. Hans Salverda maekte d’r disse foto van.

Op ‘e ere versierde waegen mit een Stellingwarver tekst tiedens et 65ste dörpsfeest van De Blesse-Peperge ston Knienebarger felicitaart. Bi’j de Knienenbargen gaot et om een buurtien langs de Stienwieker- of Oolde rieksweg in et zudelike pat van De Blesse. (Foto en tekst: Henk Jager)