Bi’j et kampeerplak De Hertenweide in Zorgvlied bruken ze et Stellingwarfs mit riegelmaot! Ok op et bod mit ni’js over aktiviteiten die d’r wekeliks binnen: Wat veur drokte is d’r disse weke!!! Ok de daegen van de weke bin op dat bod in et Stellingwarfs angeven, al zol et aenlik ‘deensdag’, ‘donderdag’ en ‘zaoterdag’ wezen moeten. Dat d’r now gien drokte is komt deurdat et now (jannewaori 2025) buten et seizoen is. (Gegevens en foto: Hans Salverda)

Wolterholten is niet alliend de naeme van een pad, mar ok van een Geologisch monement an dat pad. Hier bin niet alliend stiender te zien, mar d’r is ok een hiemtuun. Et pad ligt tussen et spoor en de A32 in Baors en Stienwiek op een flaank van de Wooldbarg, zie ok nommer 560. Henk Jager maekte de foto en stuurde die toe.

Wolterholten is de naeme van een pad dat tussen et spoor en de A32 in Baors en Stienwiek op een flaank van de Wooldbarg ligt. Et woorddiel Wolter het daor grif te maeken, mar zol ok op een veurnaeme duden kunnen. ‘Holten’ verwiest naor ‘hoolt’, en dus naor bos. Henk Jager van De Blesse kwam hier langes, zag de naeme en zorgde veur een foto d’r van.

De hieltied meer ziej’ et gebruuk van de officiële Stellingwarver waeternaemen. Dit bod is daor een mooi veurbeeld van. Disse fietspont verbint et Overlendepad van Ooldetriene (zie 203) mit et Overlendepad van Ooldemark. (Foto en gegevens: Henk Jager) 

Bi’j camping De Hertenweide in Zorgvlied daenken ze ok om heur honnegaasten. Die kun daor, as ze dust hebben, uut een intied oolderwets drinkbakkien veur koenen drinken. Zo dot zoe’n bakkien nog mooi dienst! Now schrieven we in et Stellingwarfs ‘neuze’, mar daor zal de gemiddelde hond him niet drok omme maeken… Hans Salverda stuurde de foto mit de gegevens op.