Vanwegens et overstikken van de Markeweg naor de feesttente van et dörpsfeest van Blesdieke is veur alle wissighied disse waorschouwing plaetst. (Foto en tekst: Henk Jager)

Aachter de deupsgezinde karke van Gieteren staot ’t Vermanings ‘uus. Daor kun tentoonstellings, fesies en vergeerderings hullen wodden. Een deupsgezinde karke wodt ok wel Vermaning nuumd. De karke in Gieteren stamt uut 1871, mar al in 1563 wodde d’r over een deupsgezinde gemiente in Gieteren schreven. (Foto en tekst: Johan Veenstra)

Ok in Stellingwarf hej’ boeren die et niet iens binnen mit de ni’je stikstofplannen. Zo staot an de Zeediek, bi’j de splissing mit de Ni’jeweg in et westen van West-Stellingwarf, dit bod. Et gaot hier om een veergezicht over een vlakte van krudenaarme Engels raaigröslanen in de Grote Venepoolder. (Gegevens en foto: Henk Jager)

Nommer 345 in disse serie is de naeme Veurhuus, een appattement in een boerderi’je in Gieteren. Daor wodt trouwens ok vaeke uus in plak van huus zegd en schreven. Een mooi veurbeeld is et prachtige Museum Giethoorn dat de naeme ’t Olde Maat Uus het. Vroeger was op dit plak an et Binnenpad de boerderi’je van de femilie Maat. In et Stellingwarfs van de Stellingwarven bruken we oolde in plak van olde. (Foto’s en tekst: Johan Veenstra)

Ok in et plak De Kuunder bruken ze et Stellingwarfs in et eupenbaor. Zoas bi’j de naeme ’t Kniphuus van disse kapselon. De foto en de gegevens zorgde Henk Jager veur.