Nommer 400 (!) in disse serie, waor we in zien laoten waor en hoe et Stellingwarfs in et eupenbaor bruukt wodt, is Bruunsmapattien op ‘e Rizzerd. In de serie zaggen we wel es eerder dat een eigennaeme bruukt wodde veur een ‘straotnaemebottien’, zoas nommer 51 mit Slagers Laene. Disse foto wodde nog niet zo lange leden maekt deur Hans Salverda.

In Waoteren staot de mooie en toepasselike naeme De Iekhof op een huus op ‘e hoeke van de Hogeweg en de Lange Drift. Zoas jim zien kunnen staon d’r om et huus henne staon hiel wat ieken! (Foto en gegevens: Hans Salverda)

De Turftente is de mooie naeme van een minikampeerplak in Wetering in Stienwiekerlaand. De naeme slat op ‘e tiny houses/kleine husies van aarmoedige (vene)arbeiders en heur grote huusholings van eertieds. (Foto en tekst: Henk Jager)

An de Heufdstraote West in Wolvege is huusdokterpraktiek De Meulehoek. Hier vlakbi’j is et appattementekompleks Meulestaete. Vlakbi’j staot ok de meule Windlust daor vroeger de Ooldhiedkaemer in zat. Et woord meule komt zo staorigan hiel arg vaeke veur in disse unieke serie  Stellingwarver naemen in et wild. (Tekst en foto: Johan Veenstra)