Bi’j et plakkien Thij, in de uurt van Tuk bi’j Stienwiek, het een minicamping daor de Stellingwarver naeme Thijenkaampe. (Foto en gegevens: Hans Salverda)
402. Prikkedille
An et Voetpad bi’j Spange staot dit prachtige husien uut 1891. En al even prachtig is de Stellingwarver naeme d’r van: Prikkedille. Een oold woord dat ‘kleinighied’ of ‘een klein ding’ betekent. Hans Salverda maekte de foto en leverde de gegevens an.
401. De Tille
In de buurtschop Medhuzen bi’j Oosterwoolde staot an de Rijweg een bod van een historische route om Appelsche, De Fochtel en Raevenswoold henne. Die route is een prachtig initiatief van de saemenwarkende dörpen Raevenswoold, Appelsche (inkl. Appelsche-Boven) en De Fochtel. Op et bod wodt hier en daor ok Stellingwarfs bruukt, en dat vienen we netuurlik ok hiel mooi. Et zol liekewel nog mooier west wezen as dat konsekwent gebeurd was. Zo wodt de buurtschop Medhuzen in et Nederlaans vermeld, mar De Tille in et Stellingwarfs. Et Grootdiep wodt twie keer nuumd, ienkeer mit de juuste schriefwieze, en ien keer as Groot Diep. Ok de infermaosie angaonde de Boven-Kuunder is, is krek as de naemsanduding d’r van, wat onzorgvuldig gebeurd. Zoks is vanzels dan toch wel wat spietig… (Foto’s en tekst: Sietske Bloemhoff)
Nedersaksisch
Zoas in Stellingwarf et Stellingwarfs beheurlik veul in et eupenbaor bruukt wodt – intied staon d’r in de rebriek op disse webstee Stellingwarfs in et ‘wild’ al 400 veurbeelden daorvan – in ere Nedersaksische regio’s is et niet eers! Annie Dedden uut Wolvege, die ok nogal es foto’s veur Stellingwarfs in et ‘wild’ instuurt zag kotleden de volgende veurbeelden daorvan in de omgeving van De Lutte in de gemiente Losser in Twente. Op iene van de foto’s kuj’ zien dat daor de overkoepelende Nedersaksische stuurgroep Nedersaksisch leeft en verbindt zorgde veur et plaetsen van een Twentse weens. Ok de Stellingwarver Schrieversronte is in die stuurgroep vertegenwoordigd.
De oflopen daegen stuurde Annie nog wat veurbeelden van Twentse teksten in et eupenbaor. Zoas Un kussie en dan goan, da’s de variaant van die wi’j hier bi’jomme kennen: Tuut en d’r uut! Jim zien wel: in et Twenst schrieven ze oa in plak van ao. Da’s aenlik wel jammer, want in alle ere Nedersaksische regio’s schrieven ze, krek as oons, ao. Et zol arg mooi wezen as Twente dat ok doen gaon zol… In de gemiente Losser staon ok bodden mit spreuken, zoas twieje daorvan te zien binnen op de laeste beide foto’s. Zol zoks now ok niet slimme aorig wezen in Stellingwarf? Ja, toch?
Stellingwarfs tiedschrift DE OVEND vuuftig jaor! (30) –Doe Jan nog bi’j zien moeder huusde
Lied & tekst uut de Ovend van 2001.
