Foto van de maond

door

De foto van de maond is dit keer iene van et Stellingwarfs popfestival Stellingwarfpop. Dat festival dat wunnen wodde deur Carolien Hunneman van Oosterwoolde, wodde holen op 4 juni in Noordwoolde. Op de foto zien jim de jonge band Chop 226, waorveur de jury veul wardering had. De foto is maekt deur oold-warkgroeplid van Stellingwarfpop Jeroen van der Pol.

Bi’jkotten gaot de warkgroep al weer beginnen mit de eerste veurbereidings veur et volgende Stellingwarfpop, dat is mitien ok et eerste lustrum: in 2012 zal et festival veur de vuufde keer holen wodden. Bands kun heur daor now al veur anmellen bi’j de Stellingwarver Schrieversronte in Berkoop. Dat kan tillefonisch: 0516-451108, of via de mail info@stellingwarfs.nl.

Christine Magour

door

De kommende tied kuj’ in de Schriefklub van StellingPlus wat eerder publiceerd wark van Christine Magour uut Wolvege lezen. Dat betekent liekewel niet dat Christine niet mit ni’j wark doende is. Naodat van Christine et prachtige prenteboek veur kiender Muske Tiemen verscheen, had ze al mitien ni’je idenen en plannen veur meer. Bi’j de Stellingwarver Schrieversronte bin ze daor mar knap wies mit, en mit Christine wodt bekeken waor as in et eerste plak mit naor buten kommen zal. In elk geval kuwwe van Christine al veur et augustusnommer van et Stellingwarver tiedschrift De Ovend een biezundere bi’jdrege verwaachten.

Bin ik ontaord

Op weg naor altied (juni 2011)

Et nut van voetbal (juli 2011)

Zute (juli 2011)

Carolien Hunneman – Ik mis jow

door

Carolien Hunneman wun op 4 juni de vierde edisie van Stellingwarfpop. Carolien het et de laeste tied knap drok mit heur Stellingwarver lieties, zo is ze bi’jglieks drok in de weer mit de veurbereidings veur een cd die uutgeven wodden zal deur de Stellingwarver Schrieversronte. Daornaost zal ze nao de zommer ok op wat grotere festivals in et Nedersaksisch taelgebied optreden gaon. En dan is ze ok nog es, tegere mit schriefster en vormgeefster Herma Egberts van Berkoop en Sietske Bloemhoff van de Stellingwarver Schrieversronte drok in de weer mit een uniek digitaal lesanbod t.b.v. et vak Hiemkunde in et basisonderwies.

Kiek ok op De Stentor.nl internationale dialektendag in Heerde

e-learning Stellingwarfs

door

De kommende tied zal op de webstee StellingPlus de hieltied meer ommedaenken kommen veur de ni’je Internetkursus E-learning Stellingwarfs (in opbouw). Bi’j de kursus zal gebruuk maekt wodden van et Verklarend Handwoordenboek Stellingwarfs – Nederlands. Dat woordeboek is daoromme begin oktober 2010 al op disse webstee plaetst.
Et eerste diel van de ni’je kursus zal ansluten bi’j de al jaoren bestaonde kursus Stellingwarfs veur beginners.