Flitskursus veur Plasterk

door

12-7-14, Ype

Flitskursus Stellingwarfs veur Plasterk

Tiedens de prissentaosie van et keunstboek ‘Van schossel tot slingerpad’ en de katalegus ‘Gebonden kunst’ maekte Schrieversronteveurzitter Ype Dijkstra mitien van de gelegenhied gebruuk om ok nog es et belang van de veerdere erkenning van et Nedersaksisch, waor et Stellingwarfs onder vaalt, dudelik te maeken. Et ‘grune locht’ daorveur moet van Den Haag kommen, waor o.e. de kaemerleden Lutz Jacobi (PvdA) en Eddy van Heijum (CDA) heur geweldig veur die erkenning inzetten. Omreden menister Ronald Plasterk op dit mement aenlik de ienige is die nog wat dwasbongelt, beud Dijkstra de menister een Flitskursus Stellingwarfs an. ‘As Plasterk ienkeer wet hoe mooi oonze tael is, komt et mit de veerdere erkenning d’r van vast en zeker goed,’ neffens de SSR-veurzitter. (Foto: Lenus van der Broek)

 

SSR: plannen veur boek over De Lende

door

image6-001

Tiedens et veuroverleg dat de Stellingwarver Schrieversronte had mit de zes inleiders van et kommende Lende-symposium, bin ok de meugelikheden bepraot om mit mekeer te kommen tot een omvangriek boek over de revier De Lende. Et doel is dat in et boek alle aspekten die mit de bekendste Stellingwarver revier te maeken hebben an bod kommen. (Laeter meer…)

Geef je now al op veur et grote Lende-symposium op 14 november!

door

Lende

De Stichting Stellingwarver Schrieversronte orgeniseert op vri’jdag 14 november een Lende-symposium. Omreden et Stellingwarfs tiedschrift De Ovend dit jaor veul ommedaenken het veur de revier, wodt dit symposium as ofsluting van die biezundere jaorgaank holen.

De Lende zal tiedens et symposium van verschillende invaalshoeken belocht wodden deur drs. Dennis Worst (ontstaonsgeschiedenis), Geert Lantinga (kannelisaosie), dr. Henk Bloemhoff (naemgeving), drs. Meindert Schroor (verdedigingslinies), perf. dr. Jan Slofstra (verbanen mit ere revieren) en Peter Riksma (literetuur). Daornaost is d’r o.e. ommedaenken veur keunstuterings zoas beeldende keunst en gedichten.

Et Lende-symposium is van 9.30 tot 17.00 ure in ’t Vlechtwark in Noordwoolde, de intree is € 10,00. Opgifte is now al meugelik deur te bellen of te mailen mit et kantoor van de Schrieversronte in Berkoop: 0516-451108, info@stellingwarfs.nl.

 

De Ovend van juni: De Lende, paampels en Bontekoe

door

image7, Lende Nbk

De Lende bi’j Frankriek in Ni’jberkoop. (Omslagfoto De Ovend, Sietske Bloemhoff)

In et Stellingwarfs tiedschrift De Ovend is ok in juni weer veul interessaants te lezen. Zo vertelt Geert Lantinga in zien serie ‘De Lende van begin tot aende’ ommeraek veul biezunderheden over de revier De Lende, mit daorbi’j prachtige oolde en ni’je foto’s. Lily Köhler vertelt heur verhael ‘Privacie’ en Tonko Ufkes levert zien pat van et Nedersaksische vervolgverhael ‘De ofrekening’ dat elke keer in De Ovend staot. In de rebriek ‘Oosterse kontakten’ vertelt de Grunninger schriever Ufkes uut et Westerkertier over zien (kiek op) schrieveri’je en dat van eren. Gedichten bin d’r dit keer te lezen van Roely Bakker en Harmen Houtman, wiels Carolien Hunneman uut Finlaand weg vertelt over ‘Paosken, veurjaor en Keuningsdag’. Frans Wuijts schrift et twiede en laeste diel van ‘Mr. Bontekoe en et waopen van Oost-Stellingwarf’; van him kuwwe laeter dit jaor opni’j een wetensweerdig artikel verwaachten, mar dan over de griffioen. Henk Bloemhoff en Jan de Vries zorgen tegere veur een volkskundig artikel over de paampel in ‘Paampel: toepassing, woordgebruuk en beelden uut De Westhoeke’. In et artikel wodt verteld over de toepassing van paampels in bepaold vlechtwark. Et fotowark van Jan de Vries lat o.e. kenner Henk Oosterkamp van Munnikeburen zien, hoe hi’j an et wark is mit et snieden van paampels, et dreugen, et vlechten van een baand en et rietbossen opbienen mit zoe’n baand.  Alie Veenhouwer van Spange, now uut Scharpenzeel, lat tegere mit heur snaorske et vlechten van een baantien om een koestat zien. Uteraord is d’r nog veul meer in de 32 bladzieden tellende Ovend te lezen. Aj’ De Ovend graeg lezen willen, en ie bin gien lid van de Stellingwarver Schrieversronte; et blad is ok los te koop, et kost dan € 4,00.

 

Stellingwarver middag in ‘Et darreltien’

door

In et eupenlochttheater van Der Izzerd is d’r op zundagmiddag 6 juli een Stellingwarver middag. Tenielverieninge ‘De Vriendenkring’ speult die middag de Stellingwarver ienakter ‘De Arfenis’. De ienakter gaot over een femilie waor de laeste oolder van uut de tied raekt is en dan gaot et wel es zo, zoas et in dit verhael gaot…! Wie de Stellingwarver ienakters van ‘De vriendenkring’ kent zal disse middag beslist niet missen willen; veur eren is et een mooie gelegenhied om mit de tenielploeg in de kunde te kommen!

Mar d’r vaalt 6 juli van meer moois te genieten daor in ‘Et darreltien’. Kees Koopstra van Else zal iene van zien mooie Stellingwarver verhaelen vertellen en d’r is een kabberetière. Dat is Nelie Mulder-Winter, en heur wieze van kabberet dot wel wat an die van Tineke Schouten daenken! De Stellingwarver middag zal ofsleuten wodden deur de ienpersoonsband Roberto Gianti.

Et eupenlochttheater ‘Et Darreltien’ kuj’ aachter et dörpshuus ‘De Bult’ vienen, an de Idzardaweg 47 op ’e Rizzerd. Bi’j minder goed weer is de middag in et dörpshuus.

De intree is € 4,00, jongeren tot 18 jaor betaelen € 1,00.