Vanof maendag 13 april is d’r bi’j de Stellingwarver Schrieversronte in Berkoop twie weken lange een tentoonstelling rond de Twiede Wereldoorlog. De tentoonstelling, die holen wodt omreden et van ’t jaor 70 jaor leden is dat oons laand bevri’jd wodde, is mit naeme richt op wat d’r in die periode gebeurde in de Stellingwarver regio. De tentoonstelling wodt inricht deur Hendrik Betten van Else, Jan Menger uut De Blesse en Jan de Vries van Wolvege.
Veul materiaol dat te zien wezen zal komt van Jan Menger uut De Blesse. Tegere mit Jan de Vries richtte Menger jaoren leden al es een vergeliekbere tentoonstelling in, die was in et gemientehuus in Wolvege. Dat gebeurde doe mit naeme in et kader van et vak Hiemkunde in et basisonderwies. Ok dit keer zullen schoelen nuugd wodden om naor de tentoonstelling te kommen; d’r wodt daorveur speciaol een begeleidende lesbrief ontwikkeld deur mitwarkers van de Schrieversronte.
Hiel biezunder wodt de speciaole beeld- en geluudshoeke. Daor zullen deurlopend filmbeelden te zien wezen, mar d’r bin ok biezundere gesprekken te heuren van ooldere inwoners die nog over de zwaore oorlogstied vertellen. Veur dat laeste onderdiel zorgen Hendrik Betten en Jan de Vries.
De tentoonstelling is op maendag tot en mit donderdag te bezuken tussen negen en vier ure. Op vri’jdag en zaoterdag kuj’ terechte van 10.00 tot 17.00 ure. Op zundag is et gebouw sleuten. Veur meer info kuj’ mailen naor info@stellingwarfs.nl of bellen mit et Schrieversrontekantoor: 0516-451108.
