Roekebosch is de naeme van een klein buurtschoppien tussen Gietern, Wannepervene en Ni’jvene, en telt mar zoe’n 20 inwoners. Et is slim aorig dat de naeme op een bod vermeld staot. (Foto en gegevens: Hans Salverda)

De Markestee is een luxe groepsakkemedaosie en B&B op een terrein van een bunder an de Markeweg in Blesdieke. Et woord stee betekent plak of boerderi’je. (Foto en tekst: Johan Veenstra)

In et Huygens Huys, et oolde postkantoor van Frederiksoord, hebben twie kaemers een mooie naeme in de streektael. In De Kunstkaemer is keunst van vandaege-de-dag  te zien. Butendat is d’r toepaste keunst te zien uut de Art Deco en Art Nouveau-periode an et begin van de twintigste ieuw. (Foto’s en tekst: Johan Veenstra)

In Wolvege en Et Vene hebben ze de mooie, oolde postkantoren indertied tegen de vlakte sleugen. In Frederiksoord bin ze een stok verstaandiger west. Daor staot et nog recht overaende en is et een sieraod veur et toch al mooie dörp. Et hiet now van Huygens Huys. Et aorige is dat twie kaemers in et gebouw streektaelnaemen hebben. In De Eetkaemer kuj’ wat drinken en eten. Ze serveren daor lunchgerechten daor biologische streekprodukten in verwarkt binnen. (Foto’s en tekst: Johan Veenstra)

De Diek is ok een gewone, mar mooie Stellingwarver naeme veur een straote in Ni’jvene. Eerder wodde een weg of straote meerstentieds diek nuumd in et Stellingwarfs. De eerste naeme op et bod kuwwe nog niet goed thuusbrengen. Misschien wet iene van de kiekers en lezers van disse serie wat ‘Danninge’ inhoolt. Misschien gaot et om een naeme, mar misschien wodt d’r wel hiel wat eers mit bedoeld! (Foto en gegevens: Hans Salverda)