Dit viadukt bi’j De Smilde, onder de weg deur van De Smilde richting Beilen, het de mooie naeme Vorrelveen. Et woord vorrel geft onder eren een vierde diel argens van an. In dit geval het et te maeken mit de veenderi’je; veenarbeiders mossen indertied wel een vorrel veen ofstikken. Dat was dan et vierde diel van een stok veengrond.

Veur veerdere uutleg en veurbeelden van et gebruuk van dit aorige woord: zie et Stellingwarfs Woordeboek, diel 3. Dat inkieken kan sund flink wat jaoren ok digitaol! (Foto en infermaosie: Hans Salverda)

Tussen Hooghaelen en De Smilde kuj’ op dit plak van alles kopen, ok knieperties! Hans Salverda fietste d’r daele, zag dat en maekte een foto. Mar of hi’j alliend daorveur ofstapt is…?

Op de ruumte is de naeme van een huus dat in Ni’jtriene naost de Scheenesluus staot. Ie wonen daor in de Rottige Miente inderdaod wel wat op ’e ruumte, mar d’r is ok best nog wel hiel wat bome- en polleboel. Om dit huus henne ok wel. (Foto’s en tekst: Johan Veenstra)

Hoeve Heide & Wold is de naeme van een vekaansieboerderi’je in Waoteren, krek over de Stellingwarver greens. Et mooie is daj’ je peerd hierhenne mitnemen kunnen op vekaansie! Et woord wold komt vaeke veur in disse biezundere serie naemen. Ik zol woold zeggen en schrieven. (Tekst en foto: Johan Veenstra)

Bi’j et plakkien Tuk, vlakbi’j Stienwiek, zag Henk Jager de naeme Suder Hiddinghe veur een pension veur peerden. Vermoedelik dudet Hiddinghe op een femilienaeme.