Naodat d’r jaoren over tunteld is het de gemiente Oost-Stellingwarf dan aendelik een digitaole aktiviteitenagenda. Dat is niet alliend mooi veur meensken om daor es op te kieken naor wat d’r allemaole waor en wanneer te doen is, mar ok veur de orgenisaosies d’r van aktiviteiten. Now zal et ommes minder vaeke veurkommen dat d’r op ien en dezelde dag meerdere (grotere) aktiviteiten binnen, deur bi’j de planning eerst even op www.uutgaon.nl te kieken. Hiel mooi is vanzels dat d’r keuzen is veur een Stellingwarver naeme. Et bod op ‘e foto staot in Ni’jberkoop, mar et is rondomtoe in alle plakken te zien. Let d’r mar es op, aj’ d’r vandaege of morgen es even op uutgaon! (Foto en tekst: Sietske Bloemhoff)

Oflopen 13 meie wodde in Ni’jberkoop et mooie evenement BROED holen, dat allemaole te maeken hadde mit de meugelikheden van meer biodiversiteit en hoe aj’ daor veur ok zels veur zorgen kunnen. Et wodde orgeniseerd op et terrein van de Cruydt-Hoeck, et zo suksesvolle bedrief dat zels biologische zaoden kweekt en ze (online) verkocht. Op et evenement was ok ommedaenken veur et Stellingwarfs, zo vertelde Christine Mulder een verhael dat hielemaole paste bi’j et thema. De route d’r naor toe wodde in et Stellingwarfs angeven, al hadde et aenlik Disse kaante wezen moeten… (Foto en gegevens: Hans Salverda)

Op dit infermaosiebod in een abri bi’j Makkinge is ommedaenken veur de vroegere tramverbiening langs de Balkweg in Makkinge richting De Gediek. Rechts op et bod is de tekst in Nederlaans, links in et Stellingwarfs. (Foto’s en infermaosie: Henk Jager) 

Disse naeme staot op een mooi hokke in een hoeke laand daor geities lopen. Die kun in dit luxe onderkommen uut 2019 schoelen en slaopen. In Wapse was indertied een veentien dat eigendom was van bakker Marinus Dijkstra en zodoende Bakkersveentie nuumd wodde. En now is et dus ok de naeme van een mooi hokke veur geities. (Foto’s en tekst: Johan Veenstra)

Tussen Vledder en Diever leit et dörpien Wapse. In 1976 hebben ze daor een dörpshuus kregen dat de naeme Oens Huus kregen het. (Foto en tekst: Johan Veenstra)