’t Naber-huus is de naeme van een huus in Sunt Jaansklooster. Et dörp wodt ok wel ’t Klooster nuumd. Zo te zien ston d’r hier in 1667 al een huus. Dat is al een jaormennig leden! Ik hebbe gien idee waor de naeme wegkomt. Zol Naber hier een femilienaeme wezen kunnen? Die et wet, mag et zeggen! (Foto’s en tekst: Johan Veenstra)

In Vledder hiet et gebouw daor et döpshuus en een kefé-resteraant in zitten De Tippe. Een tippe kan een hoeke wezen van een taofel of een laeken. Een tippe grond kan ok. Misschien lag hier in vroeger daegen wel een hoekige stroke grond en dat et gebouw daoromme disse naeme kregen het. Ik wete et niet, et is mar een idee. (Foto’s en tekst: Johan Veenstra)

d’olde skoele is de naeme van een huus in et dörpien Heetveld daor vroeger de schoele in zat. De tegenwoordige schoele staot d’r naost. Heetveld leit ongeveer twie kilemeter zudelik van Sunt Jaansklooster. (Foto’s en tekst: Johan Veenstra)

In Vledder is d’r een bloemewinkel mit de naeme KREK WAK WOL. Die Stellingwarver naeme wodt ok bruukt op ‘e vesitekaorties van de winkel en veur de naeme van heur webstee. De naeme zaggen we eerder ok al in disse serie veur een huus in Appelsche, mar daor bin de drie woorden an mekere schreven. Hans Salverda zorgde veur de foto mit de gegevens.

De tuunwinkel van Else ‘Tuinwinkel Elsloo’ het een groot anbod veur Stellingwarver tunen en ropt langs de weg meensken, ok in et Stelligwarfs, op de Tune in te gaon. Now zol et aenlik ’tuun’ wezen moeten, mar de bedoeling is vanzels hiel goed bi’j disse mooie winkel. Hans Salverda fietste d’r langes en maekte disse foto.