Bi’j de Bekhofschaans bi’j Berkoop wodt de boel weer es grondig anpakt. Zo wodt onder eren et veurterrein opni’j inricht en d’r komt een ni’j plak om te parkeren. Opdrachtgever hierveur is de perveensie, die bi’j dit soorte van grote klussen altied middels een infermaosiebod angeft wat et doel is. Hiel mooi is dat de perveensie in Stellingwarf daorveur ok de Stellingwarver tael bruukt. Omreden d’r de laeste jaoren bi’j en om De Lende henne wel meer van zokke grote klussen gebeurd binnen zaggen we de Stellingwarver heufdtekst wel vaeker, mar ni’j is hier: Klaor: kastmis 2023 (Foto: Hans Salverda)

Hans Salverda maekte laestdaegs disse foto van een kontener mit de prachtige Stellingwarver tekst Wa’k kwiet wil. Die ston an de weg bi’j et kampeerplak Hertenweide in Zorgvlied. Et mooie initiatief om zokke stikkers maeken te laoten en te koop an te bieden is van et Huus van de Taol in Drenthe. Een idee veur de Stellingwarver Schrieversronte om de stikkers ok hier bi’jomme onder de meensken te brengen?

Annie Dedden uut Wolvege zag an de Boschoordweg in Buil de mooie Stellingwarver naeme De daoke op een boerderi’je.

Henk Jager van De Blesse maekte kotleden disse foto van een straotnaemebod in Else. De naeme Kloosterheerd is van een ni’j wiekien in dat plak, zo gaf hi’j an.

Bi’j Bert Oppers in Wolvege kuj’ Stellingwarver Babbelaarlikeur kopen. Aachter op ’e flesse staot: De bekendste Stellingwarver in de hiele wereld is Pieter Stuyvesant, Hi’j wodde in 1612 in Peperge geboren. Pieter was een stoere, aeventuurlijke kerel. De babbelaarlikeur die zien naeme het, is een aeventuurlik slokkien! (Foto’s en tekst: Johan Veenstra)