Wi’j schrieven van Hooltpae, mar in Hooltpae schrieven ze van Olpae. Die naeme komt al op verschillende menieren in disse zo staorigan biezundere serie veur. As et dörp (nommer 138), as vvv Olpae (282) en as sportpark Olpae (81). En now hebben ze daor dus ok een ooldejaorskefé Olpae. (Foto en tekst: Johan Veenstra)

In et ni’je onderkommen van de Stellingwarver Schrieversronte in Berkoop spattert et Stellingwarfs letterlik van de muren. In de ruumte veur vergeerderings en kursussen hangt een mooie uutvoering van et gedicht Waor ’t broest van Harmen Houtman. (Foto en tekst: Johan Veenstra)

An de raand van et Dwingelderveld en vlakbi’j et mooie brinkdörp Dwingel ligt B&B An de Esch. Waor vroeger de koenen op ’e stal stonnen, bin now mooie appattementen en B&B kaemers mit een eigen badkaemer. (Foto en tekst: Johan Veenstra)

Jurre Dedden van Noordwoolde lat graeg zien dat hi’j oge het veur de eigen streekkultuur en -tael. Kiek mar naor de stikkers die hi’j daorveur bruukt, zoas onder eren op zien oolde brommer. Die mit de tekst ‘Stellingwarfs as ’t even kan! vaalt wat de kleur angaot krek even beter op as de ere Stellingwarver stikker ‘Stellingwarfs please!’ Mar ok die vertoont hi’j graeg! (Foto’s en gegevens: Annie Dedden)

Aachter et raem van et ni’je onderkommen van de Stellingwarver Schrieversronte in Berkoop hangt ok een bericht. Et is op disse wieze meer as dudelik wanneer aj’ d’r terechtekunnen. (Foto en tekst: Johan Veenstra)