Stellingwarfs in et ‘wild’

De Steense is de naeme van de sporthal in Wolvege. In et Stellingwarfs schrieven we steenze of stienze mit een z en niet mit een s. Op dit plak ston vroeger de Lycklama Stins die bouwd laoten wodde deur grietman Rinco Lycklama à Nijeholt. Et gebouw was op et laeste een brakke en wodde in 1736 ofbreuken. In laeter jaoren ston d’r een deftig laandhuus (zie foto) dat ok van Lycklama Stins hiette. Dat gebouw wodde in 1933 ofbreuken. Wat toch spietig… Johan Veenstra stuurde beide foto’s op veur Stellingwarfs in et ‘wild’.

Bi´jtieden kommen op verschillende plakken dezelde naemen veur. Nommer 24 in disse serie is de Meuleveldweg in Buil. Mar… Oosterwoolde het ok een Meuleveldweg! De foto veur Stellingwarfs in et ‘wild’ wodde instuurd deur Johan Veenstra.

As nommer 73 in disse serie komt de schoele van Hooltpae veur die de naeme De Striepe het. Striepe betekent in et Stellingwarfs: lange, smalle stroke laand. Mar d’r bin meer striepen… In Oosterwoolde het een straote de naeme De Striepe. Johan Veenstra stuurde de foto in veur de rebriek ‘Stelliongwarfs in et ‘wild’. 

Is dit now niet een prachtig veurbeeld van Stellingwarfs in et ‘wild’? Kiender van et dörp Ooldetriene zorgden d’r veur daj’ et wel laoten om te hadde langs heur schoele ‘De Lantscheene’ te rieden!! De foto’s wodden instuurd deur Freddie de Vries.

Een prachtig netuurgebied is et Diakonievene bi’j Ni’jberkoop. In et gebied kommen nog hiel wat biezundere plaanten en voegels veur. Mar ok kuj’ d’r biezundere vlinders zien en reptielen, zoas de adder. Vanof et parkeerplak an de Alberdalaene (boverste foto) kuj’ et gebied in. Op een infermaosiebod is een route angeven, mar routes van 6, 7 en 13 kilemeter bin ok daele te haelen op de webstee van It Fryske Gea, dat et gebied in hanen het. Arg mooi is dat It Fryske Gea de oorspronkelike naemen van zien gebieden in ere hoolt. In et Friestaelige pat van de perveensie gebeurt dat in et Fries, en in Stellingwarf in et Stellingwarfs. In disse serie Stellingwarfs in et ‘wild’ zullen jim daor nog meer veurbeelden van zien.