Stellingwarfs in et ‘wild’

  

‘Mooi da’j west bin’n… gauw weer komm’n’ is te lezen op ‘e aachterkaante van et toegangsbod bi’j de ingang naor et eupenlochttheater De Koele van Appelsche. Et is mitien nommer 120 in de rebriek Stellingwarfs in ’t ‘wild’. Et is vanzels wel een betien jammer dat de spelling van et Stellingwarfs niet goed bruukt is… Dan zol d’r ommes staon hebben: ‘Mooi daj’ west binnen… gauw weer kommen’. Veur de foto’s zorgde Renzo Bruggink uut Raevenswoold.

  

De naeme De Koele kwammen we eerder ok al es tegen in disse rebriek (nr. 87). Et gong doe om De Koele bi’j Hooltpae. Mar De Koele is ok de naeme van et zo mooie eupenlochttheater van Appelsche! Veur de foto’s zorgde Renzo Bruggink van Raevenswoold.

  

Een slegge is een leegte of een leeg diel in et laand. Soms is zoe’n slegge ontstaon deur verzakking omreden d’r eerder een sloot lag. Ok een verzakt diel in een oprit of pad wodt wel een slegge nuumd. Et zol daoromme niet vremd wezen as de weg – De Slegge in Appelsche – wat leger ligt as de omgeving d’r omhenne. De foto’s veur Stellingwarfs in et ‘wild’ wodden oons toestuurd deur Renzo Bruggink van Raevenswoold.

  

JIm lazzen en zaggen al bi’j nommer 116 van de serie Stellingwarfs in et ‘wild’ de ni’je naeme ‘De brogge van Jikke’ van de brogge in Ni’jlaemer. Diezelde dag onthulde borgemeister Gerard van Klaveren ok een plaquette, daor een foto van en een gedicht over Jikke Oosterhof op te zien is. Et gedicht schreef Harmen Houtman uut Et Vene, mar van vroeger van Ni’jhooltpae.

 

De brogge van Ni’jlaemer

 

Starke, stille overtocht,

oolde, stevige, staolen brogge,

kniepoogt vaek’ de Schipsloot  toe,

vermant et haostig warkers-volk:

‘rogge recht, en loop wat vlogger’.

 

Brogge tussen boom en gruun,

soezerig dichte, vlot weer eupen,

aarms goezen deur de locht;

scharnierespul mit peze-kracht,

is tussen twie bochten kreupen.

 

Jikke trok de klompen an

dri’jde veerdig an de slinger,

zee de schippers  vaeke gedag,

nao zeuvenveertig jaor pas muj

in knoest en pols’ en vingers

 

’t Kefe dat alle schippen telt,

scharpe boegen golven deur,

centen, stuvers, dubbelties,

even een posien broggeschoft;

’t Verlof zegt A en tóch likeur !

 

Stille steert et waachtershuus,

mit d’ ogen van zien hoge kaemer,

naor et winters noorden toe,

waor de redens krassen op ’e

’vroege’ baene van Ni’jlaemer…

De brogge in Ni’jlaemer over De Schipsloot het sund kot now ok officeel de naeme ‘de Brogge van Jikke’. De brogge is nuumd naor Jikke Oosterhof, die in de veurige ieuw een groot pat van heur leven hier broggewaachter was. Borgemeister Van Klaveren van West-Stellingwarf onthulde dezelde dag, in anwezigheid van de femilie van Jikke,  ok een plaquette bi’j de brogge mit een gedicht van Harmen Houtman d’r op, dat over broggewaachter Jikke vertelt. De foto veur de rebriek Stellingwarfs in ’t wild wodde instuurd deur Harmen Houtman.