Stellingwarfs in et ‘wild’

De brogge in Ni’jlaemer over De Schipsloot het sund kot now ok officeel de naeme ‘de Brogge van Jikke’. De brogge is nuumd naor Jikke Oosterhof, die in de veurige ieuw een groot pat van heur leven hier broggewaachter was. Borgemeister Van Klaveren van West-Stellingwarf onthulde dezelde dag, in anwezigheid van de femilie van Jikke,  ok een plaquette bi’j de brogge mit een gedicht van Harmen Houtman d’r op, dat over broggewaachter Jikke vertelt. De foto veur de rebriek Stellingwarfs in ’t wild wodde instuurd deur Harmen Houtman.

Ok in Appelsche wodt et Stellingwarfs in et ‘wild’ bruukt. Zoas hier, langs de vaort, veur een verkoopplak van aorige snuusteri’jen. Ieder die thuus nog aorige spullegies, snuusteri’jen dus, over het en die wel kwiet wil kan ze hier naor toe brengen. Mar lichtkaans ziej’ vanzels in De Snuusteri’je ok weer wat dat je krek van passe komt…

Et dörpshuus van Munnikeburen het as naeme ’t Poolderhuus. Et is vanzels ok bestemd veur de inwoners van Scharpenzeel. Die beide dörpen liggen ommes an mekeer vaaste. Mar… ’t Poolderhuus staot op et grondgebied van Munnikeburen! Foto en tekst veur Stellingwarfs in et ‘wild’ wodden instuurd deur Johan Veenstra.

In de buurtschop Tronde is op een woning de zo aorige Stellingwarver naeme ‘De Wildhoeke’ te zien. De foto d’r van wodde veur Stellingwarfs in et ‘wild’ instuurd deur Hendrik Betten.

Van Hendrik Betten en Johan Veenstra kregen we veur de rebriek Stellingwarfs in et ‘wild’ foto’s binnen van disse waorschouwende tekst op een bod in Else. Johan Veenstra zegt daorover: ‘Hoewel de spelling van et Stellingwarfs niet hielemaole neffens de veurschriften is, is de bosschop op dit bottien in Else meer as dudelik. Aj’ hier et hiem opdurven te gaon maek ie kaans daj’ deur een kwaoie hond pakt en lichtkaans opvreten wodden. Al sutelende he’k me laestdaegs niks van die tekst antrokken. Ik bin gewoon et arf oplopen, hebbe veur een goeie twintig euro an negosie verkocht, en bin zonder kleerscheuren mit de kroje weer op ’e hadde diek kommen. Ik hebbe d’r gien hond zien…’