Stellingwarfs in et ‘wild’

Philo Bloemhoff was jaoren projektleider streektael an de Iesselakedemie, now ‘Overiesselakedemie’. Ze was in 1990 betrokken bi’j de naemgeving Kuunderse Sluus an de ni’je verbiening tussen De Lende en De Kuunder (de revier). Zol et bod d’r nog wezen? Ja, ontdekte ze op 27-7-2024. Op heur verzuuk maekte de Kuunderse sluuswaachterske doe disse foto.

De Menning is de naeme van een verzorgingshuus in Wilhelminaoord. Een menning of menninge is etzelde as een reed. Een zaandweg deur et laand naor een hoeke bouw of een boerderi’je. (Foto’s en tekst: Johan Veenstra)

Snackbar/kefé Bliede in Noordwoolde komt al veur in disse serie onder nommer 286. Mar butendeure bi’j et terras staot op een bod ok nog de tekst Bliede daj’ d’r bint! Ze bin in Noordwoolde nogal vaeke bliede, want onder de plaknaembodden van dat dörp staot Bliede dat jim oons dorp bezuken (nommer 47). En wi’j bin weer bliede omdat ze in Noordwoolde et Stellingwarfs zo vaeke bruken. (Foto en tekst: Johan Veenstra)

Femmie van Veen van Hooltpae kreeg van heur dörpsgenoot Tjibbe Prinsen disse beide foto’s van de twie prachtige Stellingwarver teksten die hi’j op zien vrachtauto staon het. (Foto’s en gegevens: Tjibbe Prinsen)

Kotleden was d’r in De Blesse een prachtige optocht, waor ok et Stellingwarfs een mooi plakkien kreeg. Zo was d’r op verschillende versierde waegens en karren te lezen De leste nijtjes uut de Blesse gaon as een… En hier en daor was merStellingwarfs te zien, zoas bi’j de versierde karre die de eerste pries wun. Daor ston ok op Van wie is dat d’r eene?! (Foto’s en gegevens: Henk Jager)