Stellingwarfs in et ‘wild’

Al sund jaor en dag staon d’r op ‘e plaknaemebodden van Noordwoolde aorige menieren om de bezukers an et dörp dag te zeggen. Niet alliend bi’j et kommen, mar ok bi’j et gaon. Op disse foto zien jim daor een veurbeeld van. De foto wodde veur Stellingwarfs in et ‘wild’ instuurd deur Annie Dedden van Blesdieke.

Van Annie Dedden uut Blesdieke kwam veur de rebriek Stellingwarfs in et ‘wild’ disse mooie Stellingwarver naeme De Stoelemaeker binnen. Et is de naeme van et laeste meubelmaekersbedrief in Stellingwarf, dat op ambachtelike wieze nog meubels maekt van rotan, manou en pitriet. De Stoelemaeker kuj’ vienen op ‘e Oosterstreek.

Johan Veenstra van Ni’jhooltpae stuurde disse weke een foto op van een Stellingwarver naeme in Noordwoolde. Et gaot om de Meule Passage. De Meule Passage is een winkelpassage in Noordwoolde vlakbi’j de Noordwooldiger meule, die op disse foto mit de kop krek boven de Passage uutstikt.

Van Frank Spijkers van Buil, mar ok van Fettje Alten uut Noordwoolde kregen we een foto van een Stellingwarver straotnaeme uut Buil, et gaot om De Daoken. Neffens et Stellingwarfs Woordeboek is een daoke: 1. een rieten dak 2. een laoge riet onder de dakpannen 3. een dak van stro 4. een dak 5. een leeg, nat stok laand, vaeke begruuid mit heide en bentepollen 6. lange strook grond in et heideveld 7. flinke laoge van bi’jglieks grös dat gruuit.

Hans Liest van Berkoop stuurde opni’j een foto veur Stellingwarfs in et ‘wild’ . Dit keer gaot et om een naeme die niet veul meer bruukt wodden zal, mar die nog wel te zien is op et hokkien veur et speulmateriaol van basisschoele ‘De Tjongeling’ in Berkoop. ”t Strobbe-nussien’ was eertieds de naeme van de kleuterschoele doe die nog te vienen was op et plak daor now de tennisbaenen liggen.