Jong van hatte mit et Stellingwarfs de toekomst in
In Tronde, bi’j Else, staot de ‘Varkens-Zorgboerderij’ mit de Stellingwarver naeme De Stobbepoele. Vlakbi’j de boerderi’je ligt in een mooi netuurlik laandschop een poele mit dezelde naeme. Die Stobbepoele wodt al sund jaor en dag winters bruukt as iesbaene van Else. De foto wodde instuurd deur Annie Dedden van Blesdieke.
Ok in Scharpenzeel in de Westhoek van West-Stellingwarf ziej’ Stellingwarfs in ’t wild. Schrieversrontemitwarkster Immy Sloot maekte de foto van de naeme van de speultuun in heur dörp.
Van Fettje Alten van Noordwoolde kregen we disse foto van de Meuleveldweg. De foto is neumen op et plak daor de Meuleveldweg uutkomt in de buurtschop Riesberkaampen bi’j Buil.
Veur de rebriek Stellingwarfs in et wild kregen we van Annie Dedden van Blesdieke disse beide foto’s. Et huus mit de naeme ‘De knienebergen’ staot in De Blesse. Et zol wezen kunnen dat et hier om een oolde veldnaeme gaot, die angeft dat et een wat heuvelachtige omgeving is daor een boel knienen veurkwammen. Op meer plakken komt de naeme as veldnaeme veur, zo ok in Berkoop, mar dan as ‘De knienebarg’.
An de Snellingerdiek in Oosterwoolde staot et aktiviteitencentrum mit de Stellingwarver naeme ‘De Miente’. In et centrum wo’n veul kulturele aktiviteiten orgeniseerd, en d’r is ok onderdak veur de lekaole omroep Odrie. Mit ‘miente’ wodt gemienschoppelik laand bedield; laand dat deur meerdere boeren bruukt wodde. Ok as streeknaeme komt et veur, zoas de buurtschop bi’j Noordwoolde. ‘De Miente’ in Oosterwoolde geft an dat et centrum bedoeld is veur gemienschoppelik gebruuk. De foto’s wodden maekt en opstuurd deur Joke Brouwer uut Oosterwoolde.