Jong van hatte mit et Stellingwarfs de toekomst in
In Ni’jberkoop ziej’ op de veurgevel van een huus de Stellingwarver naeme ‘Bi’j de sparrebos’. Dat huus kikt uut op een oolde bos mit oolde sparren. In et Stellingwarfs wo’n dennebomen sparrebomen nuumd, en sparrebomen dennebomen. Nuver? Now, nee toch? Ok in et Nederlaans zingen we mit de kastdaegen bi’j de kastboom ‘O denneboom’. In et Duuts wodt de sparreboon trouwens ok ‘Tannenbaum’ nuumd. I
‘Dukerzicht’ is te lezen op een huus in Noordwoolde dat uutkikt op kefé-resteraant ‘De Duker’ (zie foto nommer 48 in disse serie). Annie Dedden stuurd de foto toe veur Stellingwarfs in et ‘wild’.
Krek as nommer 13 uut disse serie (De Brogge) is De Foeke de naeme van een straote in een pat van Wolvege daor de straotnaemen betrekking hebben op et netuurgebied Rottige Miente in de Westhoeke van West-Stellingwarf. Johan Veenstra stuurde de foto in veur Stellingwarfs in et ‘wild’.
Soms komt een naeme meerdere keren veur wat aanders veur. Nommer 12 in disse serie betreft et woord Schaopedobbe in Else. Et gaot hier om de vroegere schaopewaskersdobbe in een netuurgebied dat van It Fryske Gea is. Mar daor vlakbi’j, ok in Else dus, is een boerderi’je mit groepsakkemedaosie die ok van De Schaopedobbe hiet. De foto veur Stellingwarfs in et ‘wild’ wodde instuurd deur Fettje Alten.
De Tentepolle is de naeme van et bezukerscentrum van Staotsbosbeheer in netuurgebied Rottige Miente in Ni’jtriene. Een tente is, zeker in dit gebied, de naeme van een vaeks wat aarmoedig husien. Veur disse foto’s veur Stellingwarfs in et ‘wild’ zorgde Johan Veenstra.