Jong van hatte mit et Stellingwarfs de toekomst in
Bi’j Appelsche hej’ de Butenplaets De Hildenberg, een prachtig park mit luxe villa’s en een uutdaegende golfbaene. Et park dreegt de naeme van de oolde buurtschop ‘Hildenbarg’, daor laeter dit jaor over te lezen is in et Stellingwarfs tiedschrift ‘De Ovend’. Et adres van De Hildenberg is ‘Gruun’, een Stellingwarver naeme. Mar ok de weggies op et park zels hebben Stellingwarver naemen. Akkie Zeilstra van Raevenswoold stuurde de foto op veur ‘Stellingwarfs in et wild’.
In Oosterwoolde staot an de Oerkampweg een huus mit al herwertsjaoren de prachtige Stellingwarver naeme ’t Zunnehuus. Et is al weer nommer 66 in de riegel van Stellingwarver naemen in ’t wild!
Een appattementekompleks in Wolvege het de naeme Et West. Dat is een toepasselike naeme, want et staot op et west van Wolvege. De foto’s veur Stellingwarfs in et ‘wild’ wodden instuurd deur Johan Veenstra.
An de Grindweg in Wolvege vien ie Museum ’t Kiekhuus. Et museum, dat in een vroegere bakkeri’je zien plak vunnen het, bestaot al sund 1988. In et museum is o.e. een prachtige verzaemeling oolde blikken en blikkies te zien, mar ok een oolde schoeleklasse. De foto veur Stellingwarfs in et ‘wild’ wodde instuurd deur Annie Dedden.
Bi’j de ofsluting van de grote Laandinrichting Fochtelervene wodde op 4 oktober 2013 een biezunder monement onthuld. Op et monement van Jannes de Vries, dat et belang van waeter veur de vorming van vene verbeelt, is een gedicht van Willem Tjebbe Oostenbrink uut et Westerkertier plaetst. Et gedicht van Oostenbrink wodde vertaeld deur Sietske Bloemhoff. De meerst oostelike foto’s veur Stellingwarfs in et ‘wild’ an now toe wodden instuurd deur Ype Dijkstra van Oosterwoolde.