Onderwies

Harm Smid en Andries van der Veen mit leerlingen van de Kampingerhofschoele, links juf Tineke Nicolai. (Foto: Lenus van der Broek)

Kieken vanuut de voegelkiekhutte! (Foto: Lenus van der Broek)

Andries van der Veen lat jonge slangegies zien. (Foto: Lenus van der Broek)

Deensdag 19 meie hul de Stellingwarver Schrieversronte de eerste netuurexkursie van dit jaor veur et basisonderwies in Stellingwarf. Disse eerste keer gong een groep leerlingen van de Kampingerhofschoele van Oosterwoolde et veld in mit de netuurkenners Andries van der Veen en Harm Smid uut Wolvege. Veurdat de groep o.l.v. heur juf Tineke Nicolai op ’e fiets naor et Fochtelervene ofzette, vertelde Harm Smid in schoele an de haand van een PowerPoint over voegels die in Stellingwarf veurkommen. Die PowerPoint wodde een peer jaor leden speciaol veur et basisonderwies ontwikkeld en klaormaekt deur voegelkenner en fotograaf Ruurd Jelle van der Leij. Deur de inleiding van Smid wodden de leerlingen al een betien op de hoogte brocht mit wat ze misschien in et Fochtelervene zien gaon zollen. In et Fochtelervene wodde vanuut de voegelkiekhutte uutkeken over et vene en wodden verschillende voegels zien, de brune kiekendief was daor iene van. Daornao wodde d’r een kuiertocht deur et venegebied holen waorbi’j Andries van der Veen o.e. vertelde over et veurkommen van verschillende slangen, zoas de ringslange en de adder. Op de foto lat Van der Veen een jonge adder en ringslange zien. En dat maekte vanzels een boel indrok bi’j de kiender!

Kotleden hul voegelwaachter Hans Lanting van Hooltwoolde twie prachtige exkursies veur leerlingen van de schoelen van Ooldelaemer en Ooldetriene. Die exkursies wo’n orgeniseerd deur de Stellingwarver Schrieversronte vanwegens et verschienen van Et Stellingwarver Voegelboek. Veur dit soorte van biezundere projekten in et kader van de netuur, en uutvoerd deur vri’jwilligers, wodt deur et ministerie van Ekenomische Zaeken subsidie beschikber steld om dit te orgeniseren. Veur et projekt van de Schrieversronte bleek arg veul wardering van de kaante van Den Haag, zodat de uutvoering d’r van de oflopen tied uutvoerd wodden kon.

Iene van die exkursies die Hans Lanting orgeniseerde gong naor et gebied bi’j de Braandemeer, de ere was in de buurt van de schoele zels. Lanting leut veurofgaonde an de exkursie o.e. een tal verschillende voegelnussies zien, mar maekte bi’j de introduktie van de exkursie ok gebruuk van de powerpoint, die speciaol veur et projekt ontwikkeld is deur Ruurd Jelle van der Leij. Beide schoelen weren zo enthousiast dat Hans Lanting mitien vraogd is om volgend jaor weer een peer exkursies te verzorgen.

De kommende tied holen o.e. Harm Smid en Freddie de Vries nog exkursies in o.e.Blesdieke en bi’j Wolvege. Et doel is dat in et veurjaor van 2015 opni’j een acht tot tien schoelen gebruuk maeken kunnen van dit biezundere anbod.

(Foto’s: Lieske Schiere)