Beeld en geluud

meziek, beeld, geluud, media

GEEF JE OP VEUR STELLINGWARFPOP!

door

STELLINGWARFPOP OP ZAOTERDAG 9 NOVEMBER

Zoas eerder al ankondigd wodde is de zesde edisie van Stellingwarfpop op zaoterdagaovend 9 november. Et festival is dit keer binnen en dat is in et dörpshuus van Makkinge. Ondertussen hebben heur de eerste bands en singer-songwriters al anmeld en daor is de veurbereidende kemmissie vanzels ommeraek bliede mit. Tiedens et festival zal d’r ok een optreden wezen van de winners van Stellingwarfpop 2012, dat weren Serge Epskamp en Erwin van de Ven. Zi’j wunnen et festival doe mit et schitterende lietien ‘Laeste volle maone’.

DSC_2319

Serge Epskamp en Erwin van de Ven (links) wunnen Stellingwarfpop 2013 (foto: Lenus van der Broek)

Stellingwarfpop 2013 zal prissenteerd wodden deur Fons Herder uut Grunningen, mar van oorsprong van Oosterwoolde. Fons is veural bekend as zanger van de band ‘A liquid landscape’, een band die geweldig an de weg timmert. Tiedens et eerste Stellingwarfpop wun Fons mit Mukusha (een gelegendhiesfermaosie van him en zien meziekmaoten Niels en Robert van Dam), mit et prachtige, akoestisch uutvoerde  ‘Mooie dingen’  de twiede pries.

Op dit mement is ok de jury bekend, die bestaot krek as veurig jaor uut de leden Robert van Dam (uut Grunningen, bassist/gitarist ‘A liquid landscape’), meziekkenner/muzikaant Klaas Ozinga uut Makkinge en Peter Riksma (Zaandpol, neerlandikus en kenner van et Stellingwarfs, bestuurslid Stellingwarver Schrieversronte).

Om mitdoen te kunnen moet elke dielnemer op zien minst ien Stellingwarfstaelig lietien naor veuren brengen. Dat lietien moet oorspronkelik wezen, dat gelt niet alliend veur de tekst, mar ok veur de meziek. Vertaelings kommen niet in anmarking veur de priezen, mar meugen vanzels wel tiedens de optredens bruukt wodden. De priezen bestaon ok dit jaor weer uut drie geldpriezen: de eerste preis is € 250,00, de twiede € 125,00 en de dadde € 75,00.

Wie graeg mitdoen wil: je opgeven kan bi’j de Stellingwarver Schrieversronte in Berkoop. Dat kan deur even te mailen naor info@stellingwarfs.nl. Bellen kan ok, et tillefoonnr. is 0516-451108, dan even vraogen naor Sietske Bloemhoff.

 

Facebook event: https://www.facebook.com/events/172832882876548/

 

Geef je op veur STELLINGWARFPOP!

door

Ok dit jaor orgeniseert de Stellingwarver Schrieversronte opni’j et popfestival ‘Stellingwarfpop’. Et festival wodt in et naojaor holen, dit keer is et binnen. Daotum en plak bin nog niet bekend, mar wie mitdoen wil kan him now al anmellen bi’j de Stellingwarver Schrieversronte in Berkoop (info@stellingwarfs.nl, 0516-451108). Iederiene kan an et festival mitdoen, as d’r mar op zien minst ien Stellingwarfs lietien naor veuren brocht wodt. Dat moet dan wel oorspronkelik wezen, dus mit een eigen tekst en melodie. Niet alliend bands, mar bi’jglieks ok singer-songwriters of rappers kun an Stellingwarfpop mitdoen. Ok eerdere winners van et festival meugen mitdoen. Veur de beste drie dielnemers bin d’r opni’j mooie geldpriezen beschikber steld. Eerdaegs wo’n daotum en plak bekend maekt. In 2012 wun Serge Epskamp uut Zaandhuzen de eerste pries.

Uut de tieze: ni’je videoblog

door

Sund 1 meert is op de websteden van de regionaole kraanten ‘Nieuwe Ooststellingwerver’ en de ‘Stellingwerf’ de videoblog Uut de tieze te zien. In de ni’je rebriek vertelt dr. Henk Bloemhoff elke weke wat over de Nedersaksische tael et Stellingwarfs. Meerstal zal et dus over de tael zels gaon, waor komt een bepaold woord weg en wat betekent et percies. Now en dan zullen d’r ok ere biezunderheden uut et Stellingwarver gebied an de odder kommen, zoas biezundere gebouwen of plakken. De videoblog wodt elke vri’jdag verni’jd. Et is zeker de muuite weerd om de wetensweerdigheden die in Uut de tieze uut de doeken daon wodden wekeliks te volgen!