De spoonzepoddestoel (sponszwam) komt in Stellingwarf nog wel veur, mar daj’ him now hiel vaeke zien is ok weer niet et geval. Ie kun de poddestoel soms vienen in de buurt van naaldbomen. Disse wodde zien in Ni’jberkoop. (Sietske Bloemhoff)
Beeld en geluud
meziek, beeld, geluud, media
Sprokien van de haast
Bruun staon de bomen
geduldig te dromen
over et pad
en de grunende gracht.
Rood is et blad;
een uutbundige pracht
straolt uut de kleuren
een sprokiesgebeuren.
Doodstille naachten;
keboolterties waachten
rustig heur tied.
Aachter de deuren
staon potties mit kleuren;
kwassies ontbreken d’r niet.
’t Maontien verschient;
rap as de wiend
eupen die deuren!
Now gaot et gebeuren:
de bos wodt een toverkesteel!
Overal zwaarven
ze mit heur penseel,
overal vaarven
ze rood, bruun en geel.
Kleine keboolterties,
schilderties toch!
’t Maontien dat lacht
hoog’ in de locht,
diep’ in de gracht.
Kleine keboolters,
de dag is d’r weer,
straolend van locht.
Och, bin jim vlocht?
‘k Zie jim niet meer.
’t Wark van jim hanen,
ja, dát is d’r nog!
‘k Wol jim bedaanken,
waor wonen jim toch?
Jouk, uut ‘Een haandvol speulgoed’, 1972
Foto: Lenus van der Broek
Haastige foto
Vrachten blad valen op et mement van de bomen, zoks heurt now ienkeer bi’j de tied van et jaor. Ok bi’j de Stellingwarver Schrieversronte in Berkoop roegelt et blad deurlopend van de prachtige beukebomen an de Willinge Prinsstraote. (Foto: Lenus van der Broek)
Foto’s van de maond
Haast 2014: mooie sfeerbeelden in Stellingwarf van Lenus van der Broek:
Stellingwarfpop op 22 november in Makkinge
Et Makkingster Shady Lane wodde in 2013 twiede (foto: Lenus v.d. Broek)
Op zaoterdagaovend 22 november wodt Stellingwarfpop opni’j in et dörpshuus van Makkinge holen. Naodat et festival daor in 2013 veur et eerst was, wodde vanwegens de goeie erverings over en weer al gauw besleuten om opni’j naor Makkinge toe te gaon. Vanof half achte kan iederiene in et Makkingester dörpshuus et streekfestival mitmaeken, de toegang is gratis.
Stellingwarfpop is niet zomar een festival, et is een festival waor een wedstried an verbunnen is. Iederiene die mitdot moet op zien minst ien Stellingwarfstaelig lietien naor veuren brengen, et mag daorbi’j niet om een vertaelde cover gaon. Et betekent dus ok dat ok de meziek oorspronkelik wezen moet.
Dit keer doen mit: Megin’s Move, The After Midlife Group, Serge Epskamp, Spirit of the Dark, Carmentheband en Shady Lane. Een deskundige jury, mit o.e. meziekkenner Klaas Ozinga en neerlandikus Peter Riksma, zal de uuteindelike winner anwiezen.
Stellingwarfpop wodt orgeniseerd deur de Stellingwarver Schrieversronte om et gebruuk van et Stellingwarfs binnen de Stellingwarver meziekwereld meer an te vieteren.
Bi’j et aldereerste Stellingwarfpop, dat in 2007 op et Pastorieplein van Wolvege holen wodde, weren d’r minder beparkings om mit te doen as de laeste jaoren. Dat betekende dat doe mar liefst 24 bands heur veur et festival anmelden en veural gebruuk van vertaelings en/of covers. De orgenisaosie besleut om die meugelikhied uut te sluten en de jaoren daornao bleek mitien de kwaliteit van et festival dudelik te verbeteren.