Megin’s Move wun Stellingwarfpop overtugend. Rechts Minke Soolsma, links Lucia Hebers. (Foto: Janko Blaauw)
Veul kwaliteit was d’r zaoterdagaovend te heuren tiedens de zeuvende edisie van Stellingwarfpop. Et was daoromme veur de jury nog niet zo ienvooldig om de in heur ogen drie beste Stellingwarver lieties an te wiezen. Toch bleken Klaas Ozinga, Peter Riksma en Frank Spijkers et hielemaole iens te wezen angaonde de winner van de eerste pries. Die was veur et folkduo Megin’s Move, en as d’r een pebliekspries west wezen zol, hadden Minke Soolsma (zang, gitaar) en Lucia Hebers (trommen, basgitaar, zang) daorveur zeker ok hoge ogen scoord.
De twiede pries was krek as veurig jaor veur Shady Lane uut Makkinge. Die band zorgde opni’j veur een ommeraek goed optreden en een arg goed Stellingwarfs nommer. De dadde pries was veur The After Midlife Group uut Wolvege, die daormit die pries veur de dadde keer wunnen. Veul wardering was d’r veur heur hiele optreden, ok al omreden alle lieties en de prissentaosie hielemaole in et Stellingwarfs was.. Mar ok ‘Spirit of the dark’ van Else zorgde veur veul eigen Stellingwarfs wark en eupende et festival niet alliend daoromme al hiel goed. Carmentheband, de band van gitarist Rob Zandgrond, die in et daegeliks leven o.e. meziekles geft an et Lendekollege in Wolvege, zorgde veur een stevig en goed verzorgd optreden, mit veurtreffelike zang van de in Haulerwiek woonachtige Sietske Sietsma.
Hiel arg jammer was dat et optreden van Serge Epskamp van Zaandhuzen niet deurgaon kon. Middags kwam hi’j slim ongelokkig te valen wat him een kneusde aarm en schoolder opleverde. Et festival wodde op een vlotte en eigen wieze prissenteerd deur Jelke Nijboer van Berkoop. In 2015 wodt Stellingwarfpop opni’j orgeniseerd, mar de orgeniserende warkgroep van de Stellingwarver Schrieversronte wil weer es kieken naor een aandere opzet.
Harlingen in ’e mist
Et zoolt van de zee bit mien droom kepot
De kracht van de wiend blaost mien toekomst vot
De stienen van de diek liggen zwaor in mien lief
Et waeter van de zee kropt ok nog omhogens.
Harlingen in ‘e mist, ziej’ wel wat d’r mist?
Verdwaeld in de stad, et pad is nat en gries
Ik bin mien hatte verleuren, en kan niet veerder zien
Want Harlingen in ‘e mist, ik weet wel wat d’r mist.
Ik dwael deur de stad, ie bin hier ok al west
Et geluud van de misthoorn jankt de hiele dag
De zunne het zien nocht en zakt vot in de zee
Ik dwael deur de stad, de straoten bin leeg.
Harlingen in ‘e mist, ziej’ wel wat d’r mist?
Verdwaeld in ‘e stad, et pad is nat en gries
Ik bin mien hatte verleuren, en kan niet veerder zien
Want Harlingen in ‘e mist, ik weet wel wat d’r mist.
De zee, de zee, hi’j nemt en hi’j brengt
In de haven drift een schip en ik daenk dat et zinkt
De wiend trekt weer an, de mist trekt naor et laand
De maone, de maone, verlocht, verlocht mien pad.
Harlingen in ‘e mist, ik weet wel wat d’r mist.
Ik bin mien hatte verleuren, mar kan weer veerder zien.
Harlingen in ‘e mist, ik weet wel wat d’r mist.
Ik bin mien hatte verleuren, mar kan weer veerder zien.
