Op vri’jdagaovend 16 meert geneuten een kleine 200 meensken van de dadde ienakteraovend die de Stellingwarver Schrieversronte orgeniseerde vanwegens et 40-jaorig jubileum van de stichting. Lees meer in: Prachtige ienakteraovend in Oosterwoolde Ok dit keer zorgde Lenus van der Broek weer veur een prachtig foto-album:
Jubileum 2012
Ienakteraovend Else
Roem honderd meensken geneuten van twiede ienakteraovend
Op zaoterdag 25 feberwaori wodde in Else de twiede ienakteraovend holen die de Stellingwarver Schrieversronte dit jaor orgeniseert vanwegens et 40-jaorig bestaon van de stichting. In Else voerde de tenielklub van Buil ‘Nut en genoegen’ de jubileumienakter Veertig jaor! Et fesien op van Harmen Houtman. De twiede ienakter wodde naor veuren brocht deur de tenielklub van Else, et gong om de hilarische ienakter Een schoon milieu kost een protte centen van Johan Veenstra. Et muzikaole diel wodde verzorgd deur et Elsiger smatlappekoor ‘Elser Smart’ dat o.l.v. Janny Bakker twie keer een riegel prachtige lieties naor veuren brocht, waoronder ok een tal Stellingwarver.
De opkomst van roem honderd personen is biezunder goed te numen, butendat kreeg de Schrieversronte opni’j veul lof veur et orgeniseren van dit soort genoeglike Stellingwarver aovens.
De eerstvolgende ienakteraovend is al op vri’jdag 16 meert, die aovend is in Hotel De Zon in Oosterwoolde. In Oosterwoolde brengt de tenielklub van Else opni’j de ienakter van Johan Veenstra naor veuren, wiels een speciaole tenielklub van Oosterwoolde de al even komische ienakter De schriever van et dörpsbelang van Trinus Riemersma (in een vertaeling van Sjoukje Oosterloo) opvoeren zal. Daornaost treedt et waeterkaantkoor ‘De Kompagnonsvrouwluden’ van Oosterwoolde op. Et pergramme begint om 20.00 ure, de toegang is ommenocht.
Ok veur et Elsiger foto-album zorgde Lenus van der Broek uut Wolvege.
(Foto’s www.lenusvanderbroek.nl)
Op ‘e schostienmaantel
Sund 23 feberwaori bin d’r via de You Tube-link van StellingPlus (anklikken in et koppelingenblok) een tal uutzendings van et Stellingwarfstaelige radiopergramme Op ‘e schostienmaantel te beluusteren. Et pergramme wodde beginjaoren 70 van de veurige ieuw negen keer uutzunnen op de reginaole zender RONO in Frieslaand. Veur et pergramme zorgde een mit naeme jonge groep Stellingwarvers, die laeter, op 29 april 1972 de Stellingwarver Schrieversronte oprichten zol.
Eerste literaire aovend Schrieversronte
Op 20 jannewaori was de eerste literaire aovend van een serie van drie die de Stellingwarver Schrieversronte dit jaor vanwegens et 40-jaorig jubileum orgeniseert. Tiedens de aovend wodde et 24e boek Mit et waeter veur de dokter van Johan Veenstra prissenteerd. De eerste exemplaoren weren veur de Friese schriever Ferdinand de Jong en de Drentse schriever Jan Germs. Veur de drie optredens van alle drie de schrievers was ommeraek veul wardering. Dat gul zeker ok veur et prachtige optreden van de Grunninger (folk)meziekgroep Törf. Zoe’n 175 (!) meensken maekten disse biezundere aovend mit in MFC ‘De ni’je stienze’ in Ni’jhooltpae. Ok veur et foto-album van de eerste literaire aovend zorgde Lenus van der Broek van Wolvege (www.lenusvanderbroek.nl).
Foto-album 40-jaorig jubileum
Jim zien hier een foto-impressie van de eerste jubileum-ienakteraovend van de Stellingwarver Schrieversronte, die holen wodde op 14 jannewaori in ’t Vlechtwark in Noordwoolde. Veur et foto-album zorgde Lenus van der Broek uut Wolvege (www.lenusvanderbroek.nl).