Jubileum 2012

Prachtige Stellingwarver aovend op ‘e Rizzerd

door

Zaoterdagaovend 20 april wodde in MFC De Bult in Der Izzerd al weer de vierde Stellingwarver ienakteraovend holen. Et pebliek (roem 90 personen) kon genieten van twie ienakters die beide deur tenielveriening ‘De Vriendenkring’ van Der Izzerd opvoerd wodden. Daornaost zorgde et kabberetgezelschop The Flying Stars van Hooltpae veur een riegel vermaekelike en soms kolderieke schetsies en prachtige sfeervolle lieties.

Lees et hiele verslag in: Ienakteraovend in Der Izzerd. Veur et onderstaonde foto-album zorgde fotograaf Lenus van der Broek uut Wolvege.

 

Ni’je Stellingwarver vlagge

door

Vanwegens et 40-jaorig jubileum van de Stellingwarver Schrieversronte op 5 april wodde op die dag o.e. een ni’je Stellingwarver vlagge prissenteerd.  Naodat in 2009 een speciaole vlagge ontwikkeld was veur et feestelike jaor Stellingwarf 700 (et was doe 700 jaor leden dat de naeme Stellingwarf veur et eerst schriftelik bruukt wodde), weren d’r verscheiden meensken die angavven dat ze veur de toekomst graeg een vergeliekbere vlagge hebben willen zollen. Mar dan uteraord zonder et speciaole 700 jaor tintien! De ontwarper van de vlagge (Sjoerd Hoogenkamp van Wolvege) het daoromme zien ontwarp van doe wat ommewarkt naor een algemieneren iene. Op de ni’je vlagge bin de griffioenen van beide gemienten te zien, mit daoronder de anduding ‘Stellingwarf’. De griffioenen bin ofdrokt in een vermiljoenrooie kleur op een wit vlak. De ni’je vlagge is van een degelike kwaliteit, kost € 34,50 en is te koop bi’j de Stellingwarver Schrieversronte in Berkoop.

20 april: vierde ienakteraovend!

door

Op vri’jdagaovend 20 april wodt op ‘e Rizzerd de vierde Stellingwarver ienakteraovend holen in et kader van veertig jaor Stellingwarver Schrieversronte. De aovend is veur iederiene vri’j toegaankelik, de intree is ommenocht! Disse aovend zal de tenielklub van Der Izzerd De Vriendenkring twie ienakters naor veuren brengen: Et is allemaole de schuld van de katte, een deur Koosje Hornstra uut et Nederlaans vertaelde ienakter en Een schoon milieu kost een protte centen, een komische ienakter van Johan Veenstra. Daornaost zullen de Fying Stars van Hooltpae veur prachtige Stellingwarver lieties zorgen, mar de suksesvolle klub zal ok prachtige schetsies zien laoten uut heur pergrammes van de oflopen jaoren. De warkgroep Publiciteit van de Stellingwarver Schrieversronte zorgt butendat veur een grote verlotting daor aj’ tal van mooie priezen mit winnen kunnen. De aovend begint om 20.00 ure.

Taelkundige dr. Henk Bloemhoff onderscheiden

door

(Foto Lenus van der Broek)

An et aende van de jubileumbi’jienkomst vanwegens et 40-jaorig bestaon van de Stellingwarver Schrieversronte wodde Henk Bloemhoff van Oosterwoolde benuumd tot Ridder in de Odder van Oranje Nassau. De onderscheiding kreeg Bloemhoff opspeld deur burgemeester Harry Oosterman van Stellingwarf-Oostaende vanwegens zien grote inzet veur et Stellingwarfs en de Stellingwarver Schrieversronte deur de jaoren henne. Zie en luuster ok naor:

Omroep Frieslaand: http://bit.ly/HiXE7d

Liwwadder kraante: http://www.lc.nl/friesland/regio/article14777973.ece/Taalkundige-Henk-Bloemhoff-geridderd

Speciaol jubileumnommer van Stellingwarfs tiedschrift De Ovend

door

Niet alliend de Stellingwarver Schrieversronte bestaot dit jaor 40 jaor, etzelde gelt ok veur et Stellingwarfs tiedschrift De Ovend.

Tiedens et jubileum van de Stellingwarver Schrieversronte kon an et aende van de bi’jienkomst een speciaol jubileumnommer van et tiedschrift an alle jubileumvierders mitgeven wodden. Veur dit biezundere nommer was een speciaole gaastredaktie saemensteld, die beston uut Antje van Dijk-van der Lende (raodslid veur de VVD in West-Stellingwarf), Jesper Christensen (raodslid veur de PvdA in Oost-Stellingwarf) en Peter Riksma (neerlandikus en bestuurslid van de Stellingwarver Schrieversronte).

Veur et biezundere nommer was eerder een oproep daon om wark in te sturen. Op de oproep wodde butengewoon goed reageerd. D’r kwammen veul inzendings binnen, zodat de kemmissie veul keuze hadde om et blad mit te vullen. Veur et jubileumnommer was ok de mitwarking vraogd van twie jonge fotografen die vaeker wark leveren veur de Stellingwarver Schrieversronte. Ruurd Jelle van der Leij zorgde veur een prachtige serie netuurfoto’s mit daorbi’j de technische uutleg over elke foto, hi’j leverde butendat ok de omslagfoto. Marije Kuiper keus uut een lange lieste van naemen van vri’jwilligers een zestal die ze op petret zette, ze zorgde ok veur de bi’jheurende tekst.

In et blad bin veul mooie gedichten te lezen van o.e. Christine Magour, Willem Jan Teijema, Sake Russchen, Harmen Houtman en Johan Veenstra. Daornaost bin ok kotte verhaelen en kollums opneumen, o.e. van Anne Bult en Klaas Boersma. Et blad begint liekewel mit een vraoggesprek dat Peter Riksma had mit schaetster en zangeres/muzikaant Carolien Hunneman uut Oosterwoolde. Veur de mooie foto’s van Carolien zorgde vormgeefster en fotografe Herma Egberts van Berkoop.

De Ovend wodt an alle leden van de Stellingwarver Schrieversronte toestuurd, mar is ok in de losse verkoop te kriegen bi’j boekhaandel Bruna in Oosterwoolde en boekhaandel Zwikstra in Wolvege (pries: €3,50).

 

Foto (Ruurd Jelle van der Leij) omslag jubileumnommer De Ovend:

‘Nao 40 jaor oolde koenen uut de sloot haelen? Welnee, wi’j kieken veuruut!’