Algemien

Ni’je webstee Schrieversronte

door

Sund een posien het de Stellingwarver Schrieversronte een ni’je, overkoepelende, webstee. Dat is www.stellingwarver-schrieversronte.nl. Wie op die webstee kikt, zicht de drie websteden die de stichting uut Berkoop ondertussen verzorgt en beheert.

Et gaot om de algemiene webstee stellingwarfs.nl, daor mit naeme veul infermaosie en ni’js op te vienen is angaonde de tael en de aachtergronden daorvan. Ok is d’r alle andacht veur de streek- en laandschopsgeschiedenis.

De twiede webstee is stellingplus.nl, die veural bedoeld is om alle aktiviteiten en ni’jgies van de SSR op te vermelden. D’r wo’n ok mit riegelmaot verhaelen en gedichten, foto’s, streekgerechten, streuken én ‘dwarrels’ op plaetst. Zoe’n ‘dwarrel’ kuj’ een betien vergelieken mit ‘Loesje’.

De dadde webstee is stellingia.nl, dat is et digitale Kenniscentrum van de Stellingwarver Schrieversronte. Op termien zullen daor alle (biezundere) kollekties, boeken, tiedschriften, et knipselarchief en et geluuds- en beeldarchief uut et unieke Kenniscentrum in Berkoop op plaetst wodden.

Ontmoetingsmark onderwies en kultuur groot sukses

door

markt, 16-4-15

In et MFA in Berkoop wodde donderdag 16 april veur et eerst een grote ontmoetingsmark veur onderwies en kultuur holen. Alle Stellingwarver basisschoelen weren veur de speciaole mark nuugd om infermaosie op te doen van instellings en personen die heur mit keunst en kultuur, mar ok mit netuur, doende holen. Deur de schoelen wodden goeie zaeken daon mit o.e. Kunst & Coo (meziek, daans), beeldend keunsteners, biebeltheken Zuudoost-Frieslaand, steunpunt NME/IVN (netuur) en de Stellingwarver Schrieversronte (arfgoed, historie en tael). De orgenisaosie was in hanen van kultuurkoördinater veur et basisonderwies Daniëlle van Peer.

Indrokwekkend verhael joodse warkkaampen

door

Niek 2

Niek, 1

Bi’j de Stellingwarver Schrieversronte in Berkoop hul auteur en journalist Niek van der Oord donderdagaovend veur zoe’n vuuftig belangstellenden een indrokwekkend verhael over joodse warkkaampen. Die warkkaampen wodden begin 1942 inricht om joodse manluden in onder te brengen en an et wark te zetten. Ok in Stellingwarf haj’ drie van zokke kaampen, die weren in De Fochtel, Else en bi’j Blesdieke. In de naacht van 2 op 3 oktober 1942 wodden deur et hiele laand henne alle kaampen in ienkeer ontruumd. Alle mannen wodden ofvoerd naor Westerbork en vervolgens naor de vernietigingskaampen in o.e. Auschwitz en Sobibor.

Van der Oord zet him al sund jaor en dag in veur de Stichting Joodse Werkkampen in Friesland en Drenthe. Behalven dat die stichting zorgt, of zorgd het, veur herinneringsmonementen op de plakken waor de kaampen weren, wodde bi’jglieks ok een ‘kiekdeuzemuseum’ inricht in et veurmaolige kaamp in Vledder. In dat museum is o.e. te zien hoe as d’r in zoe’n kaamp woond wodde. De Stichting Joodse Werkkampen is op et mement doende mit et inrichten van een groter museum in et vroegere munisiedepot in Nieuw Balinge.

Nao ofloop van de lezing schaften veul bezukers een exemplaor an van de krek verschenen dadde drok van Van der Oord zien boek ‘Joodse werkkampen’.

Foto’s: Lenus v.d. Broek

Lezing Joodse warkkaampen

door

Niek, 3

Kommende donderdagaovend 16 april vertelt Niek van der Oord an de haand van een PowerPoint een uutgebreid verhael over de Joodse warkkaampen in oonze regio. Die lezing is bi’j de Stellingwarver Schrieversronte en begint om 20.00 ure. D’r is een beparkt tal stoelen; ie moe’n je daoromme even opgeven: info@stellingwarfs.nl, 0516-451108. De toegang is € 5,00.

Tentoonstelling WO2 deur burgemeester Oosterman eupend

door

burgemeester, Niek

Maendagmorgen 13 april eupende burgemeester Harry Oosterman van Oost-Stellingwarf een biezundere tentoonstelling rond de Twiede Wereldoorlog. Bi’j die eupening weren kiender van basisschoele De Lamer betrokken, zi’j warken dit veurjaor an een groot projekt rond die oorlog. Oosterman gaf an dat hi’j et van groot belang acht dat kiender weet hebben van die verschrikkelike periode 40-45. Dat oons laand now al 70 jaor niet betrokken west het bi’j oorlogen is best biezunder. Niet zoveer veur die tied haj’ ommes de Eerste Wereldoporlog en in de 19e ieuw was d’r ok nogal es oorlog. Vandaege-de-dag is d’r opni’j veul spanning in de wereld, zoas de situaosie in Oekraïne en die in et Midden-Oosten. De burgemeester komplementeerde daoromme et initiatief van de Stellingwarver Schrieversronte om een tentoonstelling te orgeniseren die mit naeme bedoeld is veur de kiender. De tentoonstelling wodde inricht deur de vri’jwilligers Jan Menger, Jan de Vries, Hendrik Betten, Pieter de Jong en Roelof Dragt, mit hulpe van Schrieversrontemitwarkster Saskia Douma.

Niek, 3

Veur disse biezundere eupening hadde de Schrieversronte ok auteur Niek van der Oord nuugd. Van der Oord vertelde de kiender an de haand van een PowerPoint over de Joodse warkkaampen zoas die hier bi’jomme indertied veurkwammen. Die kaampen weren de plakken waor Joden eerst verzaemeld en an et wark zet wodden. Begin oktober 1942 bin alle meensken die in die kaampen zatten toegelieke vothaeld en ofvoerd naor Westerbork en vervolgens naor de vernietigingskaampen. De auteur van et krek opni’j verschenen boek ‘Joodse Werkkampen’ hadde ok een koffertien mitneumen. Dat koffertien wodde deur zien eigener in bewering geven doe hi’j naor Westerbork ofvoerd wodde. Et koffertien is d’r nog altied, de eigener is nooit weerommekommen. Et verhael maekte zichtber indrok op de kiender.

Wiesje

Nao de eupening konnen de leerlingen an de haand van een begeleidende lesbrief de tentoonstelling bekieken. Mit mekeer zullen zoe’n tien schoelen de tentoonstelling bekieken gaon. De tentoonstelling, die tot en mit 26 april duurt,  is veur iederiene te bezuken. Dat kan van maen- tot en mit vri’jdag tussen 9.00 en 16.00 ure, in et weekaende van 13.00 tot 16.00 ure. De toegang is ommenocht.

kiender, 2

kiender, 3

kiender onder indrok

Veur de foto’s van disse biezundere gebeurtenis zorgde Lenus van der Broek.