Algemien

Kraanze op graf smid Land

door

Boele Land en femilie

kraanzelegging 4 meie 2015

Uut naeme van alle inwoners van Ni’jberkoop wodde op 4 meie om even veur acht ure aovens deur et bestuur van Plaetselik Belang een kraanze legd op et graf van smid Meine Land. Land wodde in december 1944 doodscheuten in zien smederi’je, doe hi’j weigerde om carbid te leveren. Bi’j de plechtighied weren zeune Boele Land, die zien vrouw en veerdere femilie anwezig. Boele Land woont sund jaor en dag in Jelsum, mar is hier bi’jomme nog altied bekend van zien Stellingwarver verhaelen. Zo schreef hi’j o.e. de Stellingwarver novelle ‘Gooldsje’.

(Foto’s: Sietske Bloemhoff)

Zoe’n 600 meensken kwammen naor de tentoonstelling ‘De Twiede Wereldoorlog in de regio’

door

De Blesse, 14415

Vanof 13 april tot en mit 26 april was d’r bi’j de Stellingwarver Schrieversronte in Berkoop de tentoonstelling  ’De Twiede Wereldoorlog in de regio’. Mit mekeer tegen de zeshonderd meensken kwammen naor Berkoop om die unieke tentoonstelling te bekieken. Roem twiehonderd d’r van weren leerlingen van tien basisschoelen uut beide Stellingwarven. Veur heur bezuuk was een speciaole lesbrief ontwikkeld, zodat alle verschillende onderwarpen van de tentoonstelling goed an bod kwammen. De leden van de warkgroep die de tentoonstelling inricht hebben, weren Hendrik Betten, Roelof Dragt, Pieter de Jong, Jan Menger en Jan de Vries. Zi’j weren ok tiedens de eupeningstieden altied bi’j de tentoonstelling betrokken,  zodat mit naeme de leerlingen mit heur eventuele vraogen bi’j heur terechte konnen. Soms kwam et ok veur dat ooldere bezukers spontaon de kiender vertelden over heur herinnerings an de periode 1940-1945. Die verhaelen maekten uteraord veul indrok. Uut de reakties het blieken daon dat d’r, bi’j de schoelen liekegoed as bi’j de ere bezukers, ommeraek veul wardering veur de tentoonstelling was. (Foto: Sietske Bloemhoff)

Netuur in et Stellingwarfs op schoeleTV

door

Freddie en RJ

Ruurd Jelle van der Leij

Op deensdag 28 april, 12 en 19 meie is voegelkenner en fotograaf Ruurd Jelle van der Leij te zien in et pergramme ‘Tsjek’ van de Friese schoeletillevisie. De vroegere inwoner van Hooltpae en fotograaf van Et Stellingwarver voegelboek verzorgt drie keer et netuuronderdiel ‘Netuurlik’ van dat pergramme veur de basisschoelen. De opnaemen bin kotleden maekt naodat hi’j vraogd was veur zien mitwarking an ‘Tsjek’. Van der Leij prissenteert zien onderwarpen in et Stellingwarfs, ok al was him vraogd om dat in et Fries te doen… De onderwarpen die an bod kommen bin de iesvoegel, de wolf en de adder. An dat dadde onderdiel warkt ok de Stellingwarver netuurkenner Andries van der Veen uut Wolvege mit. De opnaemen bin o.e. maekt in et Drents-Friese woold bi’j Appelsche.

‘Tsjek’ is op Omroep Frieslaand te zien, en begint morgens om 10.30 ure.

Et speunkruud bluuit!

door

20150421_121833

Et speunkruud is een algemiene plaante van vochtige, vruchtbere grond. Hi’j gruuit in et schaad onder bomen of struken of gewoonweg tussen et grös. De veurnaemste gruuiplakken bin in tunen en op slootkaanten. De plaante gruuit vaeke in dichte groepen, want hi’j vermeerdert him hadde mit zien okselknollegies. Pattie meensken vienen et daoromme mar ontuug. Toch starft de plaante al in de veurzoemer boven de grond of. Wat dat anbelangt kuj’ d’r mar evenpies last van hebben. De vroege blaeden bin geschikt veur de konsumptie. Ze bin onder aanderen riek an vitemine C. In de loop van de meitied wodt et gehalte gifstoffen zoe’n stok hoger dat de konsumptie dan ofraoden wodden moet.

Bron: ‘Et Stellingwarver Plaanteboek’, Henk J. Jager, Berkoop, 2006

Foto: Jaap Elzenaar

Veul belangstelling tentoonstelling WO2

door

16-4-15

Berkoop. Bi’j de Stellingwarver Schrieversronte in Berkoop is d’r ommeraek veul belangstelling veur de tentoonstelling rond de Twiede Wereldoorlog in de regio. Mit naeme veul basisschoelen maeken gebruuk van de gelegenhied om disse unieke tentoonstelling te bekieken. Veur heur bezuuk daor an is een speciaole begeleidende lesbrief ontwikkeld, zodat alle verschillende onderwarpen van de tentoonstelling goed an bod kommen. Soms komt et veur dat ooldere bezukers spontaan de kiender vertellen over heur herinnerings an de periode 1940-1945. Die verhaelen maeken uteraord veul indrok. Vri’jwilligers zorgen daornaost veur extra uutleg. De tentoonstelling is nog eupen t/m zundag 26 april, deur de weke van 9.00 tot 16.00 ure, in et weekaende van 13.00 tot 16.00 ure. De toegang is ommenocht.

Op ‘e foto: Jan Menger (De Blesse) geft uutleg an leerlingen van basisschoele ‘In de kring’ van Oosterwoolde (foto Sietske Bloemhoff).