Algemien

Gisteraovend kwam d’r bi’j de redaktie van StellingPlus een prachtig bericht binnen. D’r wodde bekendmaekt dat Johan Veenstra ien van de vuuf kandidaoten is veur de Rink van der Veldepriis 2016. Veenstra is nommeneerd veur zien roman Een vrouw van ivoor die eind augustus uutgeven wodde door de Stellingwarver Schrieversronte. De aandere vier kandidaoten veur de pries bin Willem Schoorstra (Pier), Mindert Wijnstra (De seefrou), Anne Feddema (De triennen fan Cheetah) en Hylke Tromp (Noah).

De Rink van der Veldepriis wodt sund et jaor 2004 om et jaor uutreikt deur de gemiente Smallingerlaand en de Friese Pers Boekerij. Hi’j bestaot uut een keunstwark van Anne Woudwijk en een bedrag van 1250 euro. De pries is nuumd naor de in 2001 wegraekte Friese schriever en journalist Rink van der Velde. Die zien boeken wodden jaorenlaank geweldig goed verkocht.

De winner wodt op 17 feberwaori 2016 bekendmaekt.

Vanwegens de kastdaegen en oold en ni’j is et kantoor van de Stellingwarver Schrieversronte dichte tot maendag 5 jannewaori.

Xavière Kolk overhaandigt et eerste exemplaor  van Over grote beren en knuffels an Vrouw Sietske Poepjes, dippeteerde veur o.e. tael en kultuur in de perveensie Frieslaand.

Veur et ni’je boek is al mitien veul belangstelling. Et telt 46 bladzieden, de oplaoge is 1000 stoks. 

Et twiede exemplaor was veur de wiekagent, de heer Jan Vullings. Hi’j was van et eerste begin of an betrokken bi’j de melding van et misbruuk.  

Van links naor rechts: Jan Baas (twiede veurzitter SSR), Edith Stultiens, Sietske Bloemhoff, Ype Dijkstra (veurzitter SSR), Sietske Poepjes, Jan Vullings, Baukje Luinstra, Xavière Kolk mit heur dochter. (Foto’s: Lenus v.d. Broek)

Schriefster Xavière Kolk overhaandigde op 9 december in et perveensiehuus in Liwwadden et eerste exemplaor van heur boek Over grote beren en knuffels an Vrouw Sietske Poepjes, dippeteerde veur o.e. tael en kultuur.

Et prenteboek is bedoeld veur oolden én kiender. Om een gesprek angaon te kunnen over grote meensken en de greenzen van kiender. Xavière Kolk schreef dit boekien tegere mit heur zeuntien Daniël van acht jaor. Naodat Daniël twie jaor leden zo flink was om zien geheim te vertellen, wol hi’j mithelpen om aandere kiender te bescharmen tegen grote beren.
Et boekien is schreven vanuut de beleving van kleine beer; een jongien dat graeg wil dat zien oolden trots op him binnen. Op een dag vragt de grote beer bi’j him uut de straote as hi’j even in huus komt. Kleine beer wil niet bertaol wezen, dus dot hi’j dat. As kleine beer laeter buten komt is hi’j niet meer bliede. En hi’j pist naachs inienen in zien bedde. Ok het hi’j naachtmerries en is hi’j zomar kwaod op Mem.

Stellingwarfs, Bildts, Fries en Nederlaans

Kleine beer en zien mem hopen dat dit boekien meensken helpen zal en steunen. Niet alliend veur oolden en heur kiender, mar ok veur hulpinstellings en schoelen kan dit boek mithelpen om over muuilike onderwarpen makkeliker praoten te kunnen. Omdaj’ je in je eigen taal nóg wat makkeliker uteren is et boekien mitien in vier taelen verschenen die in Frieslaand bruukt wodden: et Stellingwarfs, et Bildts, et Fries en et Nederlaans. Veur de vertaelings zorgden Baukje Luining (Bildts), Hermien van der Meer (Fries) en Sietske Bloemhoff (Stellingwarfs). Et doel is dat et boekien op termien in nog meer (streek)taelen uutgeven wodt.

Financiële steun perveensie

Veur de prachtige illestraosies en opmaek van et boek zorgde vormgeefster Edith Stultiens uut Liwwadden. Et boek is uutgeven deur de Stichting Stellingwarver Schrieversronte; et uutgeven wodde financieel meugelik maekt deur financiële steun van de perveensie Frieslaand. Veur et drokken d’r van zorgde Printbase bv in Sunt-Jehannesge. Et boek dat 46 bladzieden telt wodt verspreided onder mit naeme hulpinstellings, mar is ok romdomtoe te koop veur € 9.95.

Op maendag 9 december overhaandigt auteur Xavière Kolk et eerste exemplaor van et prenteboek ´Over grote beren en knuffels´ an vrouw Sietske Poepjes, dippeteerde veur tael en kultuur van de perveensie Frieslaand.

Et prenteboek is bedoeld veur oolden én kiender. Om een gesprek angaon te kunnen over grote meensken en de greenzen van kiender. Xavière Kolk schreef dit boekien tegere mit heur zeuntien Daniël van acht jaor. Naodat Daniël twie jaor leden zo flink was om zien geheim te vertellen, wol hi’j mithelpen om aandere kiender te bescharmen tegen grote beren.

Et boekien is schreven vanuut de beleving van kleine beer; een jongien dat graeg wil dat zien oolden trots op him binnen. Op een dag vragt de grote beer uut zien straote as hi’j even in huus komt. Kleine beer wil niet bertaol wezen, dus dot hi’j dat. As kleine beer laeter buten komt is hi’j niet meer bliede. En hi’j pist naachs inienen in zien bedde. Ok het hi’j naachtmerries en is hi’j zomar kwaod op Mem.

Kleine beer en zien mem hopen dat dit boekien, mit et verhael in vier verschillende taelen, meensken helpen zal en steunen. En dat et boekien dit muuilike onderwarp beter bespreekber maekt.

Stellingwarfs, Bildts, Fries en Nederlaans

De vier taelen in dit boekien bin taelen die in Frieslaand bruukt wodden: et Stellingwarfs, et Bildts, et Fries en et Nederlaans. Omdaj’ je over muuilike onderwarpen in je eigen taal wat makkeliker uteren kunnen.

Veur de prachtige illestraosies en opmaek van et boek zorgde Edith Stultiens uut Liwwadden. Veur de vertaelings zorgden Baukje Luining (Bildts), Hermien van der Meer (Fries) en Sietske Bloemhoff (Stellingwarfs).

Et boek wodt uutgeven deur de Stichting Stellingwarver Schrieversronte, mit financiële steun van de perveensie Frieslaand. Veur et drokken d’r van zorgt Printbase bv in Suntjohannesge.

De Stellingwarver Schrieversronte geft begin volgend jaor een mediaboekien uut mit Stellingwarver verhaelen en lieties. Et mediaboekien is veural bedoeld veur de ooldere inwoners van Stellingwarf, die in zorgtehuzen of verpleeginstellings wonen en die niet veul meer buten de deure kommen. Et mediaboekien is koppeld an et veurleesprojekt veur oolderen zoas dat al een stokmennig jaoren lopt, en dat now veerder uutbreided wodden zal. De jaorlikse veurleesaktie veur oolderen is in de wintertied, en zal disse winter begin feberwaori wezen. Een groep van zoe’n twintig vri’jwilligers gaot in die winterveurleesweke naor alle Stellingwarver zorginstellings en verpleeghuzen en naor De Menning in Wilhelminaoord. Veur de kommende keer zal ok de Thuuszorg benaoderd wodden om ok oolderen die nog wel thuuswonen kunnen in et projekt te betrekken. Et mediaboekien zal in de veurleesweke an alle zorginstellings uutdield wodden, zodat de bewoners ok buten de veurleesweke omme naor Stellingwarver verhaelen en lieties luusteren kunnen. Veur et hiele projekt krigt de Stellingwarver Schrieversronte belangrieke financiële ondersteuning van Stichting Bercoop Fonds.

Femmie van Veen lest veur in Wilgenstede in Wolvege (foto’s: Lenus v.d. Broek)

Verhaelen

Veur de verhaelen die op de cd kommen, wodde deur de Sietske Bloemhoff een selektie maekt. Zo zal Femmie van Veen (Hooltpae) verhaelen inlezen gaon van Hendrik Johannes Bergveld en Klaas Dijkstra (Langedieke) lest een tal verhaelties veur uut et boekien ‘Daegelikse dinkies’ van Klaas van der Weg (1916-1995). Oflopen 6 november vertelde Johan Veenstra (Ni’jhooltpae) al twie verhaelen uut zien bundel ‘Lamert en Lutske’. Alle verhaelen en lieties veur de cd wo’n allemaole opneumen in de studio van Serge Epskamp in Zaandhuzen.

Lieties

Ok al wodt de cd al slim ofwisselend deur de verschillende verhaelen en de verschillende veurlezers, d’r wodt ok zorgd veur een drie- tot viertal lieties. Daorveur is Henk Bloemhoff benaoderd; hi’j zal een peer bekendere, mar ok een wat onbekender lied van himzels inzingen.

Mediaboekien

De cd, die roem een ure duren zal, komt in een zonuumd mediaboekien. In dat boekien, dat 24 bladzieden tellen gaot, kommen behalven infermaosie over de verhaelen en vertellers ok biezundere aorigheden / aorige biezunderheden over de Stellingwarver regio. Veur de vormgeving van et mediaboekien zorgt Alain ter Schuur van 24BIT in Wolvege. Et mediaboekien mit cd zal ok in de losse verkoop kommen en kost dan € 10,00.