Algemien

Tiedens et Lendesymposium van een peer jaor leden weren veul schilderi’jen van De Lende die Annie Ligthart maekte te zien. Daornao was d’r een prachtige ”Lende-expesisie’ van heur in et gebouw van de Schrieversronte in Berkoop. (Foto: Lenus van der Broek)  

Tot en mit donderdag 7 juli kan tiedens kantooruren van de Stellingwarver Schrieversronte de expesisie ‘Zwarven deur de Stellingwarven’ bezocht wodden. De schilderi’jen die te zien binnen, bin allemaole van Annie Ligthart van Oosterwoolde. Ligthart is veural bekend van heur schilderi’jen die ze maekte van de revier De Lende, mar ze schildert ok op ere plakken in de Stellingwarven. Zo is d’r prachtig wark van heur te zien dat ze in de Kaele Dunen maekte en van bi’jglieks de Schaopedobbe en et Fochtelervene. Inspiraosie vun Annie Ligthart ok in verschillende plakkies in West-Stellingwarf. Zo legde ze o.e. de Braandemeer in de Westhoek en et Iekenverlaot bi’j De Hoeve vaaste op et doek. De expesisie is van maendag tot en mit donderdag te bekieken tussen 9.00 en 16.00 ure in et gebouw van de Schrieversronte in Berkoop. De toegang is vergees.

Maendagaovend 18 april hul schriever Johan Veenstra zien 3000ste optreden. Dat optreden was op ‘e Lemmer veur de Vrouwen van Nu in dat plak. Veurzitter Ype Dijkstra fielseteerde him uut naeme van bestuur, passeniel en leden van de Stellingwarver Schrieversronte. (Foto’s: Lenus van der Broek)

De aldereerste keer dat Veenstra argens vertelde was in 1975. Et vertellen nam een grote vlocht doe hi’j mit zien Stellingwarver Stiekelstokkies wekeliks op Omroep Frieslaand te heuren was. Hi’j kon doe overal in Frieslaand kommen te vertellen. Behalven in de drie zudelike perveensies het Johan Veenstra veerder in alle perveensies verteld veur alderhaande groepen volk en et is him nog nooit overkommen dat ze et Stellingwarfs argens niet verstaon konnen. Ok niet in Den Haag doe hi’j daor vertellen moch veur de vutters van Aegon in et heufdkantoor daor. Veenstra: ‘ Ik hebbe et doe wel even inleided in et Nederlaans, want de meerste meensken hadden vanzels nog nooit van de Stellingwarven en et Stellingwarfs heurd. Mar et verstaon was gien inkeld perbleem. Et was een geweldige middag en ik hebbe daor wel twintig boeken verkocht. Aj’ mar dudelik praoten, dat is vanzels wel een veurweerde.’ Et is niet verwonderlik dat Veenstra de meerste keren in et Friese Frieslaand verteld het. Mit mekeer 1421 keer. Mar hi’j was vanzels ok vaeke in de Stellingwarven aktief. West-Stellingwarf: 453 keer, Oost-Stellingwarf 399 keer. In Drenthe moch hi’j 329 keer vertellen. Johan Veenstra is nog lange niet van plan en hool d’r mit op. Veenstra: ‘Ik vien et prachtig wark. Eins vule mooier as schrieven. Dat zolange as meensken me vraogen om te kommen, stap ik in de auto en gao ’k d’r op of.’

Omdat meensken een plezierige aovend of middag hebben willen bestaot et grootste pat van zien optredens uut humoristische verhaelen. Mar de laeste tied vertelt hi’j in zien pergramme ok over en uut zien ni’je suksesroman Een vrouw van ivoor die de laeste tied veur twie lireraire priezen nommeneerd wodde. Ien van die nommenaosies wodde verzulverd. Op 3 april kreeg hi’j in theater Winsinghhof in Roden de Streektaelpries 2015 van et Dagblad van het Noorden.

Al de jaoren deur het Veenstra in et schoft en nao ofloop van zien vertelaovens en -middaegen zien eigen boeken an de man brocht. Mit mekeer het hi’j op die meniere veur zien uutgever, de Stichting Stellingwarver Schrieversronte in Berkoop, veur een kleine € 200.000,- verkocht.

Overzicht

Frieslaand:                              2273

West-Stellingwarf:      453

Oost-Stellingwarf:       399

Et Friese Frieslaand:  1421

Drenthe:                                   329

Overiessel:                                188

Grunningen:                             119

Flevolaand:                                39

Gelderlaand:                              28

Noord-Hollaand:                       11

Utrecht:                                        8

Zuud-Hollaand:                          4

België:                                           1

 

 

In de midden prieswinner van de Streektaelpries van et Dagblad van et Noorden 2015 Johan Veenstra. Links van him oold Schrieversrontebestuurslid Fettje Alten en Schrieversronteveurzitter Ype Dijkstra; an de rechterkaante juryveurzitter Eric van Oosterhout en Schrieversrontebestuurslid Geke Zanen. (Foto: Sietske Bloemhoff)

Een ommeraek mooie middag wodde et zundag 3 april veur de Stellingwarver schrieveri’je! Want in de mooie theaterzael Winsinghhof in Roden wodde bekendmaekt dat Johan Veenstra de Streektaelpries van et Dagblad van et Noorden wunnen het mit zien roman Een vrouw van ivoor.

Veur de pries weren zes boeken nommeneerd, zoas ok van de bekende Drents/Nederlaanse schriever Gerard Nijenhuis en de Grunninger schriever Jan Sybo Uffen. Veur de pries was een opvalend groot tal boeken in et Grunnings, Drents én Stellingwarfs instuurd. De jury was liekewel iendudig in zien besluut veur wie de pries dit jaor wezen zol: ‘Een vrouw van ivoor is een boek mit arg mooie verhaellijnen en dat biezundere meenselike verholings op een indrokwekkende meniere beschrift. Niet alliend inhooldelik is et boek arg goed, mar de schriever maekt ok op kundige wieze gebruuk van de prachtige menieren van zeggen in et Stellingwarfs.’

Johan Veenstra gaf in zien reaktie an slim bliede te wezen mit disse pries: ‘Ik had hier hielemaole niet op rekend, beslist niet, mar ik bin vanzels hatstikke bliede mit disse zo mooie pries!’

Veur Johan Veenstra was et de twiede keer dat hi’j disse belangrieke literaire pries wun. Zo wun hi’j in 2009 de pries mit zien roman Et geheim van de wiend. Beide boeken bin uutgeven deur de Stellingwarver Schrieversronte.

Juryveurzitter Eric van Oosterhout maekt de winner bekend.

Veul lof veur ‘Een vrouw van ivoor’!

De pries bestaot uut een geldbedrag van € 1001,00.

Ceremoniemeester Erik Harteveld kondigt Johan Veenstra an veur zien reaktie op et winnen van de pries.

Johan Veenstra reageert op et winnen van de literaire pries.

Uteraord weren d’r veur de prieswinner ok fielsetaosies van Schrieversronteveurzitter Ype Dijkstra.

(Foto’s: Sietske Bloemhoff)

 

 

 

 

Johan Veenstra vertelt uut ‘Een vrouw van ivoor’ – zien 25e boek – tiedens de prissentaosie daorvan. (Foto: Lenus v.d. Broek)

De Stellingwarver schriever Johan Veenstra het veur zien laeste roman Een vrouw van ivoor veur de twiede keer een nommenaosie kregen. Een schoffien leden wodde Veenstra mit vier Friestaelige schrievers  nommeneerd veur de Rink van der Veldepriis. Now is de schriever uut Ni’jhooltpae nommeneerd veur de Streektaelpries van et Dagblad van het Noorden. Veenstra is op ’e kotlieste/shortlist terechtekommen mit de Drentse schrievers Gerard Nijenhuis, Klaas Koops, Tieme Woldman en de Grunninger schriever Jan Siebo Uffen. Butendat is een biezundere edisie van et Drentse literaire tiedschrift Roet nommeneerd. Johan Veenstra kreeg de Streektaelpries van et Dagblad van het Noorden 2009 veur zien roman Et geheim van de wiend. In et Dagblad van het Noorden wodt Een vrouw van ivoor ongewoon eupenhattig in de streektaelliteretuur nuumd. Op zundag 3 april wodt in de Winsinghhof in Roden bekendmaekt wie de Streektaelpries 2015 krigt.

De roman Een vrouw van ivoor verscheen 21 augustus veurig jaor bi’j de Stellingwarver Schrieversronte in Berkoop en telt 176 bladzieden. De roman kreeg geweldig goeie receensies in de Liwwadder Kraante en et Dagblad van het Noorden.

Ok in 2014 en 2015 weren d’r nommenaosies veur boekuutgiften van de Stellingwarver Schrieversronte. In 2014 was dat veur et kienderboek Winterwille en in 2015 veur et boek Van schossel tot slingerpad mit wark van drie Stellingwarver dichters en drie beeldend keunsteners.

In de naozommer van 2016 verschient d’r een Stellingwarver verzaemeling van de wereldberoemde sprokies van de gebroeders Grimm: Sprokies van Grimm in et Stellingwarfs. Et gaot om een ni’j diel in een serie van de Grimmsprokies in kleine taelen. Eerder verschenen al een Friese vertaeling (2012) en een Bildtse (2015), en op 19 meert 2016 kommen ze mit een Grunninger vertaeling veur ’t locht.

Veur de Stellingwarver vertaeling zorgen Sietske en Henk Bloemhoff, bekend van de Stellingwarver Schrieversronte; de uutgever is Taalburo Popkema. In et boek zullen ongeveer twintig sprokies opneumen wodden, mit kleurrieke illestraosies van Peter Boersma&Hilda Groenesteyn (zie ofbelinge).

Et is veur et eerst dat d’r zoe’n omvangrieke verzaemeling Grimmsprokies in et Stellingwarfs verschient. Et boek is bedoeld veur iederiene, mar ’t is vanzels ok biezunder aorig om uut veur te lezen an jonge kiender.