Jong van hatte mit et Stellingwarfs de toekomst in
Jim gaon toch vandaege of morgen ok even naor de gezellige pompoenedaegen bi’j de kezeboerderi’je van Van der Gun in Berkoop? Ok de SSR staot daor mit een mooie kraom vol Stellingwarver negosie. Vandaege wodt die bemand deur Akkie Zijlstra (rechts op ‘e foto) en Albertha Zwaagstra van de warkgroep Publiciteit. Morgen zorgen Ypie v.d. Boer en Johan Veenstra veur de kraom. De foto wodde maekt deur Albertha Zwaagstra.
De Stellingwarver en Friese verhaelen van Freddie de Vries (links) en Gjalt de Groot vullen oflopen vri’jdagaovend 16 september ommeraek in de smaek. Op de gezaemelike literaire aovend van de Fryske Krite van Oosterwoolde en de Stellingwarver Schrieversronte kwammen goed vuuftig personen of. De Groot vertelde veural verhaelen uut zien jonge jaoren die hi’j deurbrocht in de omgeving van Wergea. Nao et schoft vertelde hi’j o.e. op humorische wieze over et vieren van Sunderklaos eerder, mar ok hoe hi’j now as pake zien kleinkiender veur et lappien hoolt…
Freddie de Vries las een zestal verhaelen veur uut eigen wark. Ok die warkten goed op ‘e lachspieren van de bezukers, zoas et verhael hoe via et pergramme Spoorloos een onbekende zeune veur et locht komt. Ok et verhael waoromme een Stellingwarver skiër besluut om mit zien breuken bienen en ribben naor et ziekenhuus van Meppel te gaon en niet naor dat van Et Vene, is slim vermaekelik.
In 2017 wodt opni’j een literaire aovend orgeniseerd, dan mit een extra feestelik jubileumtintien, omreden et dan de vuufde keer wezen zal disse suksesvolle aovend gezaemelik orgeniseerd wodt.
Tiedens de aovend, die in De Miente in Oosterwoolde was, dee boekhaandel Bruna goeie zaeken mit de verkoop van Stellingwarver en Friese boeken.
Links: Trijnie krigt o.e. een mooie bos bloemen van SSR-veurzitter Jan Baas
Rechts: Kollega Immy geft een ofscheidskedo uut naeme van alle kollega’s en kollega-vri’jwilligers
Naodat ze roem dattig jaor bi’j de Stellingwarver Schrieversronte warkt het, gaot Trijnie Telkamp (64) mit ingang van november mit pensioen. Donderdag 15 september was et heur laeste warkdag en was d’r om die reden een feestelik ofscheid veur Trijnie orgeniseerd. Veurzitter Jan Baas zorgde veur een biezundere toespraoke hielemaole op riem, dat slim wardeerd wodde deur iederiene. Daornao hadde direkteur Sietske Bloemhoff veul goeie woorden veur Trijnie, die al die jaoren slim plichtsgetrouw heur wark dee en heur slim inzet het veur mit naeme de opmaek van et tiedschrift De Ovend. Anslutend overhaandigde kollega Immy Sloot een kedo uut naeme van alle kollega’s, vaaste kollega-vri’jwilligers en oold-kollega Henk Bloemhoff. Nao de gezellige bi’jienkomst gong de laestnuumde groep nog mit mekeer uut eten bi’j ’t Hof in Berkoop. Dat etentien en een kevot mit inhoold wodde Trijnie Telkamp anbeuden deur de Stellingwarver Schrieversronte.
Mit mekere uut eten mit kollega’s en kollega-vri’jwilligers, v.l.n.r: Jan de Vries, Saskia Douma, Kiena Bouwer, Trijnie Telkamp, Rosa Bosma, Immy Sloot, Sietske Bloemhoff en Ankie Verbaan. Op ‘e foto ontbrekt oold-kollega en vri’jwilliger Henk Bloemhoff, die vanwegens ere verplichtings d’r niet bi’j wezen kon.
De eerste exemplaoren weren veur Femke Prakken, wethoolder Sierd de Boer (rechts) en wethoolder Frans Kloosterman. Foto: Lenus v.d. Broek
De leerlingen van de Meester K.J. Dijkstraschoele geneuten ommeraek van de middag én van et ni’je boek. Foto: Lenus v.d. Broek
‘De wolf en de zeuven geities’ is iene van de sprokies die in et ni’je boek ’Sprokies van Grimm in ’t Stellingwarfs’ staon. In et sprokien verstopt et kleinste geitien him in een klokke as de wolf van plan is om alle geities uut et geitegezin op te eten. De wolf vint dat laeste geitien niet, en uuteindelik wo’n daordeur alle ere geities redded. Femmie van Veen las tiedens de prissentaosie van et boek et sprokien veur an de leerlingen van groep 5 en 6 van de Meester K.J. Dijkstraschoele van Else en die geneuten daor mit volle teugen van.
De eerste exemplaoren van et boek wodden deur SSR-veurzitter Jan Baas uutrikt al leerlinge Femke Prakken en an de beide Stellingwarver kultuurwethoolders, de heren Sierd de Boer van Oost-Stellingwarf en Frans Kloosterman van Stellingwarf-Westaende.
Beide wethoolders weren, krek as Femke, slim inneumen mit et ni’je boek. Wethoolder De Boer gaf butendat nog es naodrokkelik an hoe belangriek hi’j et vint dat et Stellingwarfs van generaosie op generaosie deurgeven wodt: ‘Zodat jim kiender laeter et ok weer deurgeven kunnen an heur kiender as jim pake en beppe binnen.’
Tiedens de middag vertelden initiatiefnemer veur et boek Anne Popkema van Taelburo Popkema en de beide illestraters Hilda Groenesteyn en Peter Boersma over heur wark an en veur et boek. Henk Bloemhoff vertelde as vertaeler, mar ok as taelkundige, daormao over de biezunderheden van de sprokies. Dat gong allemaole middels een vraoggesprek dat SSR-direkteur Sietske Bloemhoff mit heur hadde. De leerlingen konnen intied vraogen stellen en maekten daor ommeraek gebruuk van.
’Sprokies van Grimm in ’t Stellingwarfs’ wodde uutgeven deur Taelburo Popkema uut Grunningen i.s.m. de Stellingwarver Schrieversronte. Veur de vertaeling van de sprokies zorgden Sietske Bloemhoff en Henk Bloemhoff. Et boek is te koop in de boekhaandel, bi’j de SSR en tiedens de sutelaktie.
De drie routes ‘Fietsen door het stroomgebied van De Lende’ laoten je van alle moois dat in et gebied te vienen is genieten! Foto’s: Geert Lantinga
Vlak veur de jaorlikse sutelaktie van de Stellingwarver Schrieversronte verschenen de eerste twie dielen van de routegids ’Fietsen door het stroomgebied van De Lende’. Et dadde en laeste diel van disse biezundere fietsroutes verschient laeter dit jaor tiedens een biezundere prissentaosie. De serie wodt schreven deur Geert Lantinga van Wolvege, hi’j is kenner van et Lendegebied bi’j uutstek. Et eerste diel van de serie gaot deur et gebied tussen Tronde en De Hoeve en is 40 km; et twiede diel beschrift de route tussen De Hoeve en Blesdieke en is 36 km. Diel 3 gaot deur et wesstelike diel van et stroomgebied van de revier en is 45 km. De routes sluten goed op mekeer an; et is meugelik om van de iene fietsroute veerder te gaon mit de volgende. De gidsen, die Nederlaanstaelig binnen, bin op busefermaot en tellen elk 64 bladzieden. Ze bin veurzien van veul kultuurhistorische infermaosie en unieke foto’s. In de omslaegen, die as uutklapt wodden kund, bin gebiedskaorties van de routes opneumen.
Eerder zorgde Lantinga al veur de routegidsen ’Kuieren in en om Wolvege’ en ’Langs oolde en ni’je hooltpaeden’. Mit de Lende-routegidsen komt de suksesvolle serie van de Schrieversronte now op tiene. De stichting is van plan en geef in 2017 opni’j twie routegidsen uut.
De ni’je routegidsen kosten € 8,50 et stok en bin bi’j de grotere boekhaandels, tiedens de sutelaktie en bi’j de SSR in Berkoop te koop.