Algemien

Stellingwarfs in et ‘wild’ zien we ok wel es op ere plakken as alliend in et eupenbaor. It Fryske Gea bruukt in oonze regio de Stellingwarver naemen van de netuurgebieden die ze in heur beheer hebben, en daornaost ok de officiële Stellingwarver waeternaemen. Zoks wodt vanzels slim wardeerd! Mar mooi is ok om te zien dat et Stellingwarfs in et kantoor van et Gea in Olterterp ok bruukt wodt. Doe heur mitwarker Henk Jager vuuftig wodde, zol hi’j dat weten ok! In zien eigen tael!

  En dat hi’j et now kalmpies an doen moet kan Henk zo ok niet ontkommen!

Meer van zokke aorige veurbeelden mit et gebruuk van et Stellingwarfs? Stuur ze naor info@stellingwarfs.nl, en et berichien, mit foto uteraord, wodt plaetst op StellingPlus!

Freddie de Vries (links) en Ruurd Jelle van der Leij (foto: Andries van Huizen)

Op veurdracht van de jury kent et bestuur van de Stellingwarver Schrieversronte de H.J. Bergveldpries 2016 toe an Freddie de Vries en Ruurd Jelle van der Leij, schriever en fotograaf van Et Stellingwarver Voegelboek. Bi’j Et Stellingwarver Voegelboek gaot et om een boek waor de voegels in beschreven wodden die in et gebied Stellingwarf veurkommen of veurkommen kunnen. De dudelike, toegaankelike wieze van et beschrieven van al die voegels, et prachtige fotomateriaol en een register mit naost de Stellingwarver naemen ok de naemen in et Nederlaans en Latien maekt dit boek biezunder en uniek.

De H.J. Bergveldpries wodt toekend an personen of an instellings die heur inzetten, of inzet hebben, om et Stellingwarfs en de Stellingwarver streekkultuur uut te dregen, in schrift of op een aandere wieze. In heur besluut te kiezen veur Et Stellingwarver Voegelboek volgt et bestuur van de Stichting Stellingwarver Schrieversronte de unanieme veurdracht van de jury.

Et is de eerste keer dat de Schrieversronte disse eervolle pries, bestaonde uut een geldbedrag en een penning, uutrikken zal. Et doel is om dat iens in de zes jaor te doen. Eerder rikten de Stellingwarver gemienten Oostaende en Westaende de pries om toerbeurt uut.

De uutrikkinge zal wezen op maendagaovend 17 oktober in et gebouw van de Schrieversronte in Berkoop. De bi’jienkomst is veur geneudigden.

Deur een klein verzin van de kassier van de sutelaktie, bliekt de opbrengst van de jaorlikse huus-an-huus verkoopaktie een stokkien hoger as eerder angeven. De opbrengst is dit keer niet € 7.000,-, mar zowat € 8.500,-!