Algemien

Op vri’jdag 19 meie: Symposium 1517 – 2017

door

Et van oorsprong venestroompien De Riete bi’j Boekelte is al van 1517 of een diel van de greens tussen Oost- en West-Stellingwarf. Op ‘e foto zien jim et stroompien uutkommen in De Lende. Ok die revier is veur een groot pat de greens tussen de beide gemienten. De foto is maekt vanof et grondgebied van Ni’jberkoop; we kieken uut op Boekelte. Links, an de ere kaante van De Lende is nog krek een tippien Elsiger grond te zien (foto: Sietske Bloemhoff)

In een saemenwarkingsverbaand van de Stichting Stellingwarver Schrieversronte, de Historische Vereniging Appelscha e.o, de Historische Vereniging Oosterwolde e.o. en de Vereniging Historie Weststellingwerf wodt op vri’jdagmiddag 19 meie et Symposium 1517 – 2017 holen. Dit symposium wodt orgeniseerd omreden et van ’t jaor op ’e kop of vuufhonderd jaor leden is dat et gebied Stellingwarf in twie grieteni’jen verdield wodde. Laeter zollen dit de gemienten Oost- en West-Stellingwarf wodden gaon..

Tiedens dit biezundere symposium zal d’r niet alliend ommedaenken wezen veur de periode rond 1517, mar ok veur onderwarpen die in de jaoren daornao van belang west hebben veur oons gebied. Et programma zicht d’r as volgt uut:

Vanof 13.00 ure: inloop

13.30 ure: Eupening deur dagveurzitter Ype Dijkstra

13.40 ure: ’Twee-eenheid, vijfhonderd jaar Oost- en Weststellingwerf’, deur dr. Meindert Schroor

14.20 ure: ’Rentmeestersrekens van Stellingwarf-Oostaende en Stellingwarf-Westaende/ Rentmeestersrekeningen van Stellingwerf-Oosteinde en Stellingwerf-Westeinde. Tekstuitgave met toelichting’ deur dr. Henk Bloemhoff

15.00 ure: Middelieuwse meziek van Marianta

15.15 ure: Schoft (mit meziek van Marianta)

15.35 ure: ’De familie Lycklama à Nijeholt en de OWO gemeenten. Machts- en huwelijkspolitiek’, deur Jelle Terluin

16.15 uur: ’Gelaagde identiteit en modernisering: ontwikkelingen in de Stellingwerven vanaf de jaren vijftig’, deur perf. dr. Michiel Herweijer

16.55 ure: Ofsluting, mit meziek van Marianta

De intree veur het symposium is € 10,00. Veur leden van historische verienings, dörpsarchieven en dörpskemmissies in en buten Stellingwarf gelt (bi’j risserveren veurof) de speciaole toegangspries € 7,50. Daor bin koffie, thee mit een traktaosie, een hattelike biet in et schoft en nao ofloop bi’j inbegrepen.

Plak: MFA, Willinge Prinsstraote 18c, Berkoop

Daotum: vri’jdag 19 meie

Tied: Vanof 13.00 ure inloop mit koffie/thee, et pergramme begint om 13.30 ure

Risserveren: Stellingwarver Schrieversronte, t/m donderdag 11 meie. (info@stellingwarfs.nl, 0516-451108, van mae t/m do tussen 9.00 en 16.00 ure). Betaelen kan alliend kontant op 19 meie bi’j binnenkomst.

Harmen Houtman nommeneerd

door

Veur de verhaelewedstried die alle jaoren orgeniseerd wodt deur et Skriuwersboun, Cedin en et Friesch Dagblad bin 51 verhaelen instuurd, verdield over een junior- (12) en in seniorkattegorie (39). Dit jaor was et thema ‘Gien stiel?!’. Dat onderwarp hadde te maeken mit et feit dat et van ’t jaor honderd jaor leden is dat de Nederlaanse keunstbeweginge ‘De Stijl’ opricht is.

Bi’j de volwassenen valen (in willekeurige volgodder) Jan Bijlsma (‘Jan-Pyt, Joris en Corneel’), Tryntsje van der Veer (‘Oare streken’) en Harmen Houtman (‘Niet langer wit…’) in de priezen. Et verhael van Harmen Houtman was et ienige Stellingwarver verhael dat instuurd wodde. De ere verhaelen weren allemaole in et Fries.

Nao een kotte inleiding over et thema deur museumdirekteur Paulo Martina, zal op deensdag 9 meie bekend maekt wodden wie de eerste pries wunnen het. De priesuutrikkinge is in et Museum Dr8888 in Drachten.

Vri’je Staot De Stellingen

door

Et feest is begonnen!

 

Zaoterdagmiddag 1 april wodde in Appelsche de Vri’je Staot De Stellingen uutreupen. Et was mitien et begin van een jaor vol aktiviteiten i.v.m. et vuufhonderdjaorig bestaon van Stellingwarf-Oostaende. Veur die tied bestonnen de Stellingwarven uut ien gebied, dat was et boererepubliekien Stellingwarf dat bestuurd wodde deur stellings. Et ni’je laand De Stellingen het liekewel nog gien president, mar is daor wel naor op zuke. Om tot een juuste keuze te kommen zullen alle Stellingwarver kiender vraogd wodden om daorveur te zorgen. Om ze daor op veur te bereiden is et speciaole onderwiesprojekt ’Et feest van de eerste grietman’ ontwikkeld deur Marita Kruijswijk, Marian Nesse en histotolk Frank Spijkers, i.s.m. de Stellingwarver Schrieversronte. Et gezelschop is al benaoderd deur een tiental basisschoelen; et eerste feest wodt vierd op 2 meie mit de leerlingen van basisschoele De Riemsloot in Appelsche.

  

   

(Foto’s: Sietske Bloemhoff)

SSR stelt Raod van Advies in

door

De Stellingwarver Schrieversronte het sund donderdag 16 meert een Raod van Advies. De Raod wodde deur et bestuur van de stichting insteld omreden et de hieltied meer mit, veural toekomstgerichte, zaeken te maeken krigt die mit naeme op bestuurlik terrein liggen. Om daor zo goed meugelik op in te speulen bin in de Raod van Advies personen benuumd die op verschillende gebieden veul kennis, ervering en inzicht hebben. Op dit mement bestaot de Raod van Advies uut Titia Bijwaard, Lutz Jacobi, Henk Bloemhoff, Ype Dijkstra, Victor Felder, Jan Haveman en Geert Lantinga.

Longeren

door

‘We longeren allemaole wel es naor een mooi peerd vanzels,’ schrift Otto de Vent van De Fochtel bi’j et insturen van disse foto veur de rebriek Stellingwarfs in ’t wild. Ok al vaalt zien inzending niet hielemaole onder et doel van de rebriek, biezunder is et berichien van Otto netuurlik wel!

Et woord ‘longeren’ is in et Stellingwarfs een mooi woord veur ‘stark verlangen naor’, ‘argens op zitten te vlassen’; of ‘argens op aozen’. Veural op eten, neffens et Stellingwarfs woordeboek, zie daorveur ok de volgende veurbeeldzinnegies: ‘Hi’j longert d’r op om altied mar meer te kriegen’, ‘De koenen longeren naor een ni’j stok grös’ en ‘De katte longerde naor een bod mit bri’j’.

Wi’j’ nog wat meer weten over dit aorige Stellingwarver woord? Kiek dan in et Stellingwarfs Woordeboek, diel 4. En aj’ dat niet hebben: ie kun et digitaol inzien op stellingia.nl.

In et Nederlaans het et woord ‘longeren’ liekewel een hiele ere betekenis: dan het et te maeken mit et anleren van et op de juuste wieze lopen van een peerd: veur meer infermaosie over dat longeren mar even goegelen op Internet!