Algemien

Et eerste exemplaor van et ni’je boek was veur de heer Rudolf J. Broersma van de Rie foar de Fryske Heraldiek (foto Lenus v.d. Broek)

Veurofgaonde an de prissentaosie van et boek ‘De raadselachtige gemeentewapens van de Stellingwerven’ konnen de bezukers an de aovend luusteren naor twie interessaante lezings. Veur de eerste zorgde historikus Cor Trompetter uut Wolvege; hi’j hul een beschouwing over de zin en onzin van herdaenken. N.a.v. zien interessaante kiek op die zaeke kwammen d’r aorig wat reakties uut de zowat volle bovenzael van hotel-resteraant Lunia in Berkoop. De twiede lezing was veur rekening van Jelle Terluin uut Beetsterzwaog, hi’j is een deskundige op et gebied van de heraldiek en hul een interessaante inleiding over de geschiedenis van mit naeme de griffioen in de gemientewaopens van de beide Stellingwarven. Terluin verwees in zien verhael mit riegelmaot naor et boek dat mitien nao zien lezing prissenteerd wodde.

In de midden auteur Frans Wuijts, naost him Jelle Terluin en Cor Trompetter (foto: Lenus v.d. Broek)

Nao een inleidend verhael deur siktaoris Hendrik Fokkema van de Stellingwarver Schrieversronte – Fokkema vervong veurzitter Klaas van Weperen die ere verplichtings hadde – overhaandigde auteur Frans Wuijts et eerste exemplaor van zien ni’je boek an de heer Rudolf J. Broersma, ok deskundige op et gebied van de heraldiek en o.e. lid van de Rie foar Fryske Heraldiek. Broersma hadde tiedens et schrieven an et boek Wuijts mit raod en daod bi’jstaon, en daorveur weren auteur en uutgever him slim erkentelik.

Et twiede exemplaor wodt an de auteur overhaandigd deur Hendrik Fokkema, siktaoris van de Stellingwarver Schrieversronte (foto: Lenus v.d. Broek)

Et twiede exemplaor van et boek wodde uutrikt an de auteur zels, wiels et dadde naor de Bauke Visser Koenders, de vormgever van et mooi uutvoerde boek, gong. Et vierde exemplaor was veur burgemeester Harry Oosterman van Oost-Stellingwarf die een veurwoord in et boek schreven het.

Et ni’je boek is alweer de 177^e uutgifte van de stichting Stellingwarver Schrieversronte uut Berkoop.

Et eerste exemplaor veur de ni’je bundel was veur Ria Westerhuis (foto: Lenus v.d. Broek)

Vri’jdagaovend 28 juli was in MFC De Ni’je Stienze in Ni’jhooltpae de prissentaosie van De overkaant van et waeter; de ni’jste dichtbundel van Johan Veenstra. Et eerste exemplaor daorvan was veur de Drentse dichteres Ria Westerhuis uut De Wiek. Beide dichters, die mekeer al langer kennen en veul wardering hebben veur mekaanders wark, dreugen tiedens de aovend veur uut eigen wark.  Ok veur Tonko Ufkes was d’r een eerste exemplaor van de ni’je dichtbundel. Hi’j woont in de stad Grunningen, mar komt van oorsprong van Zeuvenhuzen en praot en schrift zodoende in et Westerkertiers. Ufkes was liekewel deur de Stellingwarver Schrieversronte vraogd om beide dichters te interviewen. Dat dee hi’j op zien bekende veurtreffelike wieze, zodat et pebliek aorig wat an de weet kwam over de schrieveri’je deur Veenstra en Westerhuis.  Ufkes stelde Veenstra de hieltied een vraoge, Mar die mos eerst deur Westerhuis beantwoord wodden. Veenstra kon zodoende  even wat langer over de vraoge naodaenken… Aorig was om te heuren dat Westerhuis in et Drenst schrift mar ok in et Nederlaans, wiels Johan Veenstra angaf dat hi’j alliend in et Stellingwarfs schrieven kan. ‘Die tael beheers ik now ienkeer hielemaole, daor kan ik me goed in uutdrokken. En dat gelt veur et Nederlaans niet, die tael is me niet eigen genoeg.’

Van links naor rechts Ria Westerhuis, Tonko Ufkes en Johan Veenstra (foto: Lenus v.d. Broek)

Serge Epskamp mit lieties in et Aachterhoeks (foto: Lenus v.d. Broek)

Veur een vierde Nedersaksische streektael tiedens disse biezundere kulturele aovend zorgde Serge Epskamp. Hi’j zong en speulde een zeuvental lieties in et Aachterhoeks mit teksten en meziek van himzels. Iene van de lieties was ‘Laeste volle maone’, dat in 2012 in et Stellingwarfs vertaeld wodde en waor de Zaandhuziger dat jaor Stellingwarfpop mit wun.

De overkaant van et waeter is de laeste dichtbundel van Johan Veenstra. In de bundel staon hiele persoonlike gedichten over de meensken die kleur an zien leven geven hebben: zien moeder, onbekende vader, halfbreur en kammeraod. En netuurlik gedichten over himzels, zien dörp en zien oolde huus.

Tiedens de hiele Eupen Stal zit Johan Veenstra mit zien dichtbundel in de hal van et gebouw van de Stellingwarver Schrieversronte in Berkoop. Daor bin ok foto’s te bekieken die verschillende fotografen bi’j vuuf gedichten uut de bundel maekt hebben.

Auteur Frans Wuijts nemt de symbolische cheque in ontvangst van Gerrit Boes van de Rabobaank. In de midden Schrieversrontedirekteur Sietske Bloemhoff

De Stellingwarver Schrieversronte kreeg kotleden een bi’jdrege van € 1.000,-  van et Koperaosiefoons van Rabobaank Heerenveen-Zuidoost Friesland uutrikt. Et bedrag is bedoeld veur et meugelik maeken van de uutgifte van et boek ‘De raadselachtige gemeentewapens van Oost- en Weststellingwerf’, dat schreven wodt deur Frans Wuijts van Berkoop.
Uteraord bin de meensken van de Schrieversronte slim bliede mit dit mooie subsidiebedrag. ‘As zokke initiatieven as die van de Rabobaank, mar ok die van ere foonsen niet bestaon zollen, zol et verhipte lastig wodden om biezundere boeken uut en over de eigen regio uut te geven,’ zo geft Sietske Bloemhoff an. Intied hebben ok ere foonsen een bi’jdrege toezegd veur dusse uutgifte, zoas de Stichting Herbert Duintjer Fonds en de Kattendijke/Drucker Stichting. Et doel is dat et boek op vri’jdagaovend 8 september prissenteerd wodt.