Algemien

‘De Veerkieker’ goeie twiede in Liwwadden

door

De Veerkieker: groep 4 tegere mit muzikaant Bas van Domburg in de weer mit Stellingwarfs en meziek (foto: Marjolein Spitteler)

Oflopen donderdag wodde in et perveensiehuus in Liwwadden bekend maekt wie in et oflopen schoelejaor veur et beste arfgoededukaosieprojekt in de perveensie zorgd hadde. Dat projekt is een initiatief van Stichting Keunstwurk en de Museumfederatie Fryslân om zo projekten die andacht besteden an lekaol arfgoed te steunen. Alle projekten bin bedoeld veur leerlingen van et basisonderwies.

Dit keer weren d’r twie projekten veur de pries nommeneerd: et projekt De Veerkieker van de Stellingwarver Schrieversronte en et projekt ‘Op avontuur op Ameland’ (op initiatief van Joke Mosterman en Peter Kienstra.

As winner wodde et Amelaander projekt anwezen; dit projekt betrekt schoelekiender bi’j alles wat Amelaand te bieden het. Ien middag in de maond gaon de kiender de schoele uut om et eilaand te bekieken. In de lessen is d’r ok veul ommedaenken veur de twie Amelaander streektaelen.

Ok al wun De Veerkieker niet, de jury hadde ommeraek veul wardering veur et projekt. Bi’j dit schoelebriede hiemkundeprojekt veur alle Stellingwarver basisschoelen wodt et anbod van arfgoedinstellings in de regio koppeld an dat van, mit naeme lekaole, keunsteners. De Veerkieker wodde ontwikkeld deur Marjolein Spitteler, Willy Bergsma en Wikje Haan. Et projekt wodde financieel steund deur Fonds Ooststellingwerf en et perveensiaole Iepen Mienskipfûns.

 

 

OPROEP

door

   

De Verdwenen Peerden: een muzikaol en visueel spektaokel dat mit spoed oolde lappen zocht!

Veur dit spektaokel dat op 4 augustus 2018 in Berkoop holen wodt bin we op zuke naor ni’je en oolde, mooie en minder mooie lappen. Wie het d’r op ’e zoolder nog wat liggen? Et mag van alles wezen: ketoen, linnen, ribflewiel, wol… Kleurig en minder kleurig, bedrokt en effen. We gaon d’r patchworkklieden van maeken, waor we dan weer de kostuums van ni’jen willen veur de veurstelling. De lappen kun inleverd wodden bi’j de SSR in Berkoop tiedens kantooruren (9.00 – 16.00 ure). We kun ze evt. ok bi’j jow ophaelen. Bel dan mar even naor: 0516-451108.

Paoskevuur in Hooltpae

door

  

Paoskevuur in Hooltpae! En wat zongen ze eertieds in Hooltpae om mar genoeg branige veur et Paosvuur te kriegen?
Hej’ je nog een oolde maande / Hej’ je nog een bossien riet? / Aanders wil oons paosvuur niet branen / Aanders braant oons paosvuur niet (bron Stellingwarfs Woordeboek, foto’s Harmen Houtman)

Veul Stellingwarfs in et Taelepaveljoen van Laand van tael

door

Van 3 t/m10 juni Stellingwarfs in et Taelepaveljoen (© Afûk)

Vanof begin april t/m oktober zullen in et Taelepaviljoen MeM van et Laand van Tael in Liwwadden kleine taelen uut Europa, streektaelen en –dialekten uut Nederlaand en minderhiedstaelen uut Liwwadden centraol staon. Al die taelen zullen heur een weke lange prissenteren mit optredens van schrievers, dichters, koren en meziekgroepen, mar d’r zullen ok infermaosiemiddaegen over wezen en warkwinkels geven wodden. Mit mekeer zullen zoe’n 30 taelen van heur zien en heuren laoten: tiene uut Frieslaand en Nederlaand, tiene uut Europa en tiene uut Liwwadden.

De Scheve Schaats Band uut Wolvege (© Sietske Bloemhoff)

Vanzels is d’r ok ommedaenken veur et Stellingwarfs. De Stellingwarver weke begint op zundagmiddag 3 juni. Die middag treedt de Scheve Schaats Band van Wolvege en laoten tal van heur bekende lieties heuren. Heur optreden wodt ofwisseld deur veurdrachten van en deur Zeeuwse schrievers. Veur de Zeeuwen is et dan mitien de ofslutende middag van heur prissentaosieweke. Op donderdagaovend 7 juni wodt de Stellingwarver film ‘Daor klept de klokke weer’ vertoond in de ni’je fiilmzaek van Tresoar, wiels in et taelepaviljoen de rockband SOTD (eerder Spirit of the dark) op. Disse band rond Jannie en Eise Dijkstra uut Else hebben de laeste jaoren veur een uniek Stellingwarfstaelig rippertoire zorgd.

Dichteres Attie Nijboer van Oosterwoolde (© Sietske Bloemhoff)

Op de ofslutende Stellingwarver middag op 10 juni treden de Stellingwarver dichters Attie Nijboer en Harmen Houtman op. Die middag begint mitien de Oostfriese weke mit een optreden van de ok in Nederlaand de hieltied bekender woddende Annie Heger.

In de eerste weke van juni zorgt de Stellingwarver Schrieversronte veerder o.e. veur een middag rond de veldnaemen van Oosterwoolde, d’r is ommedaenken veur heur serie van tien routegidsen, d’r wo’n Stellingwarver volksverhaelen verteld en d’r zal een prissentaosie wezen over de klokkestoelen in Oost- en West-Stellingwarf.

Et Taelepaveljoen is te vienen in de Preenzetuun; die tuun, vlakbi’j de Oldehove, is veur dit biezundere jaor ommebouwd tot Taeletuun. Et Laand van Tael (Lân fan Taal) is een initiatief van de Afûk in et kader van Liwwadden Kulturele Heufdstad 2018.

Kjest Herder: ni’je redakteur De Ovend

door

 

Ovendredakteur Kjest Herder (foto: Sietske Bloemhoff)

Een man mit een goeie schriefervering, een briede belangstelling veur wat d’r in de omkrieten speult, ervering as redakteur van et vri’jdagmiddagpergramme ’Buurman en Buurman’ van de lekaole omroep Odrie, dat pergramme prissenteert hi’j butendat ok… En now vanof et kommende aprilnommer is Kjest Herder van Oosterwoolde ok redakteur van et Stellingwarfs tiedschrift De Ovend. Bi’j de Stellingwarver Schrieversronte is hi’j gien onbekende, want Kjest zit ok in de warkgroep die et Stellingwarfs Meziekfestival orgeniseert.

D’r wodde al een posien naor uutbreiding van de redaktie van De Ovend zocht, omreden redakteur Jannes Westerhof weten laoten het dat hi’j et vanwegens zien gezondhied wat rustiger an doen willen zol. Westerhof blift liekewel now en dan nog wel bi’jdregen leveren, zo is zien doel. Et ere redaktielid is Jan Koops, Sietske Bloemhoff is buroredakteur.

Veur de redaktie wodt nog meer uutbreiding uutkeken; anvulling d’rvan wodt zocht in Stellingwarf-Westaende.