Algemien

Stellingwarf in Vierdaegse Nijmegen

door

 

Netuurlik doen d’r alle jaoren ok Stellingwarvers mit an de Vierdaegse van Nijmegen. Da’s gien ni’js. Mar mooi is et vanzels wel as dielnemers zien laoten waor ze wegkommen. En mit riegelmaot laoten ok Stellingwarvers dat zien. Zo kuierde een peer jaor leden Geert Dekker mit zien kollegakuierders uut Wolvege de tocht in shirties mit een Stellingwarver tekst. Dit jaor dee Arie den Blanken van Makkinge, hi’j is o.e. lid van de Raod van Advies van de Stellingwarver Schrieversronte, mit en hadde de Stellingwarver vlagge van Oost an zien rogzak hangen. Bi’j ankomst op de laeste dag stak hi’j liekewel de vlagge in top van een hanteerbere vlaggemast, zodat zien bruur him herkennen zol. En dat lokte, want die maekte disse foto!

Ni’je roman van Johan Veenstra  prissenteerd

door

  

Vri’jdagaovend kwam de zeuvende roman van Johan Veenstra ’Vroeger is veurgoed veurbi’j’ uut tiedens een literaire aovend in mfc De Ni’je Stienze in Ni’jhooltpae.

De schriever gaf et eerste exemplaor an Sippy Tigchelaar die bi’j Omroep Frieslaand warkt het en indertied bi’j Veenstra thuuskwam om zien radioverhaelties op te nemen. Johan Veenstra vertelde anslutend op indrokwekkende wieze over een pat uut zien ni’je roman, zodat de ongeveer tachtig meensken die de aovend mitmaekten veur een groot diel et boek mitien anschaften. Veenstra wodde tiedens de aovend interviewd deur neerlandikus Peter Riksma uut et Drentse Zaandpol, mar van vroeger uut Wolvege. Et doel is dat een diel van dit interview laeter dit jaor plaetst wodden zal in et Stellingwarfs tiedschrift ’De Ovend’.

  

Veur meziek zorgde de Grunninger Jan Henk de Groot uut Hoogezaand. Ok dat bleek een schot in de roze te wezen; zien optreden, mit o.e. et bekende ‘De mama van Michel’, wodde ommeraek wardeerd.

Schrieversronteveurzitter Klaas van Weperen eupende en sleut de aovend en vertelde o.e. over de aktiviteiten van de SSR die d’r de kommende tied an zitten te kommen, zoas kommend weekaende et straottheater De Verdwenen Peerden, op 1 september de prissentaosie van et boek van Freddie de Vries, de sutelaktie vanof 3 september en de première van de film ‘Daor klept de klokke weer’ op 13 september.

(Foto’s: Lenus v.d. Broek)

Makkinge: Kattinga!

door

 

Op 6, 7 en 8 juli veraandert Makkinge in Kattinga. Daor wodt dan op een hiele eigen meniere, bi’j de meule, et sprokien De Gelaarsde Kat een tal keren opvoerd. Ok et Stellingwarfs komt an bod in et pergramme. Et meziekkörps Crescendo speult o.e. et Stellingwarfs Volkslied. Zie veerder op www.kattinga.nl/

Foto’s: Anneke Koopstra (rechts) en Sietske Bloemhoff

Weven mit peerdehaor

door

Weven mit peerdehaor (Foto: Marianne Kemp)

Biezundere lezing weven mit peerdehaor

Vanwegens et festival De Verdwenen Peerden, onderdiel van de LF2018 mannefestaosie Under de Toer, wodt op donderdag 28 juni een biezundere lezing holen in textielinstituut Hawar in Berkoop. Disse lezing wodt verzorgd deur Marianne Kemp uut Utrecht. An de haand van een beamerpresentaosie lat disse jonge textielkeunsteneres zien hoe mit peerdehaor prachtige weven keunstobjecten uutvoerd kund.

De lezing begint om 20.00 ure, de kosten bin € 5,00 per persoon.

Et festival De Verdwenen Peerden is op vri’jdag 3 en zaoterdag 4 augustus. Dit festival wodt orgeniseerd door de Stellingwarver Schrieversronte; textielinstituut Hawar is nauw bi’j et festival betrokken.

Eerste pries veur Harmen Houtman

door

      

 Dichter en schriever Harmen Houtman uut Et Vene, mar van vroeger van Ni’jhooltpae, het de eerste pries wunnen van een biezundere dichterswedstried van de Friese Akedemie in Liwwadden. De wedstried wodde uutschreven in et kader van et LF2018 projekt Lân fan Taal/Laand van Tael; et onderwarp mos te maeken hebben mit et wark van de Friese Akademie. De gedichten mossen butendat in et Fries schreven wodden, mar  invloeden van ere taelen mochten d’r wel in naor veuren kommen. En dat dee  Houtman mit zien gedicht  Leaf wurdboek, waorin hi’j schrift over et Friese en et Stellingwarver woordeboek. Et eerste diel van et gedicht is in et Fries schreven, et twiede in et Stellingwarfs. Harmen Houtman wodde mit beide taele grootbrocht: zien mem praotte Fries, zien heit Stellingwarfs.

Mit mekeer weren d’r 64 inzendings: de beste tien gedichten bin tot an et aende van september te zien op  grote bodden in de binnentuun van de Friese Akedemie