Algemien

• 

• 

• 

• 

Een posien leden wodde deur de ni’je eigeneresse van een netuurgebied in de buurtschop Iegypte bi’j Ni’jberkoop een oolde waeterputte (opni’j) ontdekt. De waeterputte was deur de jaoren henne aorig dichtewi’jd mit blad en toeken, zodat veur heur niet mitien dudelik was waor et omme gong.

   Via de gemiente Oost-Stellingwarf kwam Kristien Zaal Dijkstra in de kunde mit Sietske Bloemhoff van de Stellingwarver Schrieversronte en vreug of zi’j ok wus om wat veur putte et gaon kunnen zol. Now hadde Bloemhoff een hiel schoft leden al es onderzuuk daon naor et greven van waeterputten zoas dat vroeger in Stellingwarf gebeurde. Dat onderzuuk dee ze in et kader van et neteren van verschillende vaktaelen t.b.v. et ’Stellingwarfs Woordeboek’ en wus daor zodoende wel et ien en aander van of. Vandaor ok dat ze docht dat et in dit geval wel es om zoe’n soorte van putte gaon kunnen zol. Ze nam kontakt op mit Andries van der Veen uut Wolvege die in Iegypte opgruuide, en hi’j vertelde doe over zien herinnerings an de tied dat disse putte as gemienschoppelike putte  in gebruuk was bi’j de bewoners van de buurtschop. Et waeter d’r van wodde deur de hiele buurtschop bruukt as de meensken thuus niet genoeg meer hadden. Et pattien dat naor de putte toeleup is diels nog te zien.

Monement

Kristien Zaal Dijkstra hecht veul weerde an disse unieke putte. Ze perbeert daoromme om die veur de toekomst op de juuste wieze in staand te holen. Tegere mit o.e. Andries van der Veen en Sietske Bloemhoff is ze de meugelikheden an et bekieken om de putte as momement op ’e gemientelike of perveensiaole monementelieste zetten te laoten.

Opschoond

Intied hebben vri’jwilligers uut Ni’jberkoop de putte, die tussen de vuuf en zes meter diepe is, leeghaeld. Zo zorgde Jan Eijbergen dat mit naeme et eerste pat leeghaeld wodden kon mit een kraene. Et laeste stok mos liekewel mit de schoppe gebeuren, en daorveur stakken Sjoerd Kooiman en Andries van der Veen de hanen uut de mouwen. Deur de dreugte van veurig jaor en die van de laeste tied kwammen de manluden pas hielemaole onderin de putte weer wat waeter integen. Hier en daor vunnen ze ok nog oolde stokken turf, daor de putte indertied mit opzet is. Et doel is om nao de zommer de putte weer opni’j mit turven op te zetten, ok weer mit de hulpe van vri’jwilligers. Datzelde gelt ok veur et pattien dat van de weg of naor de putte toelopt. Et doel is dat ien en aander veur de winter klaor is. De hoop is vanzels dat de waeterputte tegen die tied ok op een monementelieste staot, zodat d’r een geraansie is dat disse biezundere putte veur de toekomst op een verantwoorde wieze bestaon blieven zal.     

Foto 1 t/m 4:

Jan Eijbergen hulp op kundige wieze mit et leeghaelen van de putte 

Mit schoppen, emmers en de kraene wodde et laeste stok leeghaeld

Et laeste emmertien mit bladofval wodt uut de putte taekeld

Kristien Zaal Dijkstra bekikt mit Andries van der Veen et risseltaot

Foto’s: Sietske Bloemhoff

• 

Een schoffien leden kregen we disse aorige kaorte van Otto de Vent uut De Fochtel. ‘Ok in Drenthe leeft et Stellingwarfs,’ schreef Otto daor bi’j! ‘Is et ok wat veur ‘Stellingwarfs in ’t wild’? Now, aenlik wel een klein betien, neffens oons, al zol et vanzels hiel goed wezen kunnen dat et Drents pattietoeren toch wel verhipte veul liekt op et Stellingwarfs, En now ja, hoe zal et ok eers, in een diel van Drenthe wodt ommes gewoon Stellingwarfs praot!

Et zol vanzels ommeraek mooi wezen as d’r ok dit soorte van kaorten wezen zollen mit een hiele kleine anpassing in de tekst, zodat ze ok hier rondomtoe veur vekaansiegangers te koop kommen…

• 

• 

Vanof 20 juli t/m begin oktober is d’r in et gebouw van de Stellingwarver Schrieversronte een expesisie van schilderi’jen van keunstener Dick Bakker uut Ooldetriene. In die periode bin d’r schilderi’jen te zien van de West-Stellingwarver netuurgebieden de Braandemeer en de Rottige Miente. Kenmarkend veur die gebieden bin de weren en ribben die ontstaon binnen doe d’r in de veurige ieuw vene ofgreven wodde. In de schilderi’jen lat de keunstener de gebieden in de verschillende jaorgetieden zien. Om zokke biezundere mementen vaaste te leggen maekt Bakker buten een groot tal schetsen, die hi’j daornao in zien atelier in eulievarve uutwarkt.

Dick Bakker wodde in 1954 geboren in Assen. Van 1974 tot 1979 studeerde hi’j an de akedemie veur beeldende keunsten Minerva in Grunningen. De eerste drie jaor nao et ofronden van zien studie woonde en warkte hi’j in Drenthe, van 1982 of was hi’j roem 25 jaor woonachtig in Zeelaand. Daor schilderde hi’j mit naeme de Oosterschelde, de poolders en de mit riet bedekte brakke netuurgebieden langs de Zeeuwse kust.  

In 2007 kreeg Dick Bakker de gelegenhied om in West-Stellingwarf in een ni’je omgeving warken te gaon. Behalven laandschoppen maekt hi’j ok kleinere schilderi’jen van voegels op hoolt dat hi’j vunnen het.

De expesisie kan van 20 juli tot 19 augustus daegeliks bezocht wodden tuussen 13.00 en 18.00 ure, de toegang is gratis. Daornao is et wark tiedens kantooruren van de Stellingwarver Schrieversronte te bezien.