Aktiviteiten

aktiviteiten

Alle leerlingen Comprix College slaegden!

door

Berkoop. Deensdagmorgen 9 april deden zeuven leerlingen van et Comprix College uut Oosterwoolde examen Stellingwarfs bi’j de Stellingwarver Schrieversronte in Berkoop. Naodat ze et oflopen seizoen bi’j juf Ageeth Bos lessen Stellingwarfs volgd hadden, wodden ze deur Grietje Bosma (Sunnege) en Schrieversrontedirekteur Sietske Bloemhoff toetst op heur mondelinge en schriftelike gebruuk van et Stellingwarfs.

Verteltasse

Belangriekste onderdiel van et mondelinge examen was et prissenteren van een deur de leerlingen ontwikkelde verteltasse. Et doel van die tasse is dat de leerlingen mit naeme jongere kiender in de kunde kommen laoten kunnen mit et Stellingwarfs. De inhoold van de tassen weren daorveur ok uutperbeerd bi’j kleuters op schoele, en daor dee blieken dat de tassen arg goed veur heur doel geschikt binnen. Bi’j de Stellingwarver Schrieversronte verbaosden ze heur daor hielemaole niet over, want de leerlingen hadden et tiptop veur mekeer. Ien van de groepies hadde in heur verteltasse mar liefst veur vier verschillende onderdielen zorgd: een verhael over de boerderi’je ‘Dierevrunden’, een memoriespullegien, een kleurplaete en een prachtig lied dat ze vol enthousiasme mit mekeer zongen.

Woordkaorties

Et schriftelike pat beston uut een diktee en et schrieven van zinnegies n.a.v. een twintigtal woordkaorties. Ok die beide opdrachten wodden hiel goed maekt, zodat alle leerlingen veur heur examen slaegden. Van SSR-direkteur Sietske Bloemhoff kregen ze daoromme een certifikaot uutrikt én et boek ‘Sprokies van Grimm in et Stelllingwarfs’.

Teniel op Heidepolle

door

Basisschoele Heidepolle in Wolvege sleut gister heur projekt Meertmaond – Streektaelmaond feestelik of. Dat gebeurde deur een geweldig mooi optreden van alle leerlingen van groep zesse. Die groep hadde, tegere mit heur meester, hiel hadde warkt an een Stellingwarfstaelig tenielstok, daor ze niet alliend alle rollen in speulden, mar ok zels zorgden veur et dekor en alle neudige rekwisieten. Veur et tenielspeulen kregen ze deskundige adviezen van regisseur Nelie Mulder-Winter van Wolvege. Et verhael ‘Et sprokien’, van schriever Jaap Sikkema, ok uut Wolvege, wodde speciaol veur de schoele ommewarkt tot een tenielstok deur de Stellingwarver Schrieversronte. Et tenielstok wodde  veur de schoele op film vaastelegd deur Andries van der Veen, ok uut Wolvege.

Dat et speulen en et verhael arg goed ansleugen was wel te marken an de reakties van et pebliek. Dat beston uut de leerlingen van de jongste groepen die van et begin of tot et aende van et stok zo stille weren as moesies. Een hiel groot kopmplement dus, dat nao aofloop nog es benaodrokt wodde deur Jaap Sikkema en Schrieversrontedirekteur Sietske Bloemhoff.  (Foto’s: Lenus v.d. Broek)

Meert – streektaelmaond: Streektaelweken op De Heidepolle

door

Femmie van Veen las veur uut De Hollebomebos, Henk Bloemhoff vertelde over de Stellingwarver tael (foto’s Lenus v.d. Broek)

Maendag 4 meert gongen op basisschoele De Heidepolle in Wolvege twie streektaelweken uut aende in et kader van Meert-Streektaelmaond. Tiedens de beide weken is d’r veural ommedaenken veur de Stellingwarver tael, mar ok veur de eigen streekkultuur. In een goeie wisselwarking mit de schoele zorgde de Stellingwarver Schrieversronte veur een achttal aktiviteiten, waor een achttal kenners van de tael en kultuur an mitwarken.

Op de eerste morgen vertelde taelkundige Henk Bloemhoff – schriever van et Stellingwarfs Woordeboek en jaorenlaank streektaelfunktionaoris – over et Stellingwarfs, de aachtergrond en de biezunderheden daorvan. Dat dee hi’j veur de leerlingen van groep 4 t/m 8. Femmie van Veen las veur in groep 3 uut et boek ‘De hollebomebos’, over o.e. de vervelende streken van de hekse Krakkemikka. Bi’j beide onderdielen is zorgd veur verwarkingsmateriaol.

Piepmoes en Muske Tiemen

Op deensdag 5 meert wo’n speciaol schreven verhaelties over Piepmoes verteld in groep 1 en 2, en gaot groep 6 an de slag mit een tenielstokkien in et Stellingwarfs. De dag d’r op gaot disse groep, onder deskundige leiding van Nelie Mulder-Winter, an de slag mit et oefenen d’r van. Veur dit onderdiel wodde een verhael van Jaap Sikkema ommewarkt tot een tenielstok.

Op 5 meert vertelt Christine Mulder in de groepen 4, 4/5 en 5 over heur wark as schriefster; in et biezunder over et kienderboek ’Muske Tiemen’. Niet alliend over de verhaelties, mar ok over de illestraosies die ze zels veur et boek maekte.

Johan Veenstra

Ok Johan Veenstra gaot naor de groepen 4, 4/5 en 5. Van him bin d’r mar liefst 28 boeken verschenen, en de leerlingen gaon him om die reden interviewen. Johan Veenstra vertelt ok over zien vertaeling van ‘Pake en Beppe Pluus’, een Nijntje-boekien in et Stellingwarfs.

De netuur in en foto’s

Groep 6/7 gaot op 6 meert op netuurexkursie mit netuurkenner Freddie de Vries. Veurofgaonde an de exkursie lat de auteur van et ‘Stellingwarfs Voegelboek’ eerst een PowerPoint zien, die hi’j speciaol ontwikkelde veur disse morgen. Op diezelde dag komt fotograaf Lenus v.d. Broek an groep 8 vertellen over et maeken van foto’s. Disse les is een veurbereiding op een biezundere kultuurhistorische exkursie op 7 meert.

Volksverhaelen en kultuurhistorische exkursie

Op 7 meert gaot groep 7 an de slag mit Stellingwarver volksverhaelen. Daorveur kriegen de leerlingen een film te zien over et ontstaon van De Lende, zoas dat lange leden warkelik gebeurde, mar ok hoe et neffens twie Stellingwarver volksverhaelen gebeurd wezen zol. Ok bi’j dit lesonderdiel bin een peer lesopdrachten ontwikkeld.

Geert Lantinga, Lenus v.d. Broek en Grietje Bosma-Dijkstra gaon op diezelde dag een kultuurhistorische kuier deur Wolvege maeken. Kenner van Wolvege Geert Lantinga het veur disse dag een speciaole route uutstippeld. De leerlingen van groep 8 gaon an de haand daorvan bekieken wat zi’j now van belang vienen om zunig mit te wezen en om te beweren veur meensken die over een hiele poze in Wolvege wonen zullen. Van die gebouwen, straoten, biezundere plakken of netuur maeken ze onderwegens foto’s. De weke d’r op gaot de groep o.l.v. Grietje Bosma en Geert Lantinga een verslag schrieven. Et doel is dat een tal van die verhaelen mit foto’s ok warkelik publiceerd wodden zullen.

door


Attie Nijboer in ’Tael an Taofel’

Kommende zundag 10 meert zal in et bekende Drentse kulturele pergramme ’Tael an Taofel’ dichteresse Attie Nijboer van Oosterwoolde optreden. ‘Tael an taofel’ is een kombinaosie van literetuur, zang, meziek en lekker eten. An et pergramme doen alle keren streektaelschrievers en zangers mit.

’Tael an Taofel’ is altied in een sfeervolle lekaosie, en op 10 meert is dat ok al niet aanders. Et pergramme  mit tael, meziek en ete  is dan in Dwingel, in Grand Café De Brink (Brink 30-31). Et begint allemaole om 11.00 ure en duurt tot 14.00 ure an toe. Behalven Attie Nijboer dot  Janet Lopstra mit, mit verhaelen en lat de groep Vollek (mit Grunninger folk en blues) van him heuren.

Vanwegens de altied grote belangstelling is op tied risserveren an te raoden! Meer infermaosie kuj’ vienen op https://huusvandetaol.nl/.   

De Verdwenen Peerden in Liwwadden

door

Donderdagaovend 14 feberwaori hoolt de orgenisaosie van et LF2018 projekt Under de Toer nog een ofslutende aovend in de Grote Karke van Liwwadden. Veur die aovend bin een tal manifestaosies van de mit mekeer 32 vraogd om heur nog ienkeer te prissenteren. Ok de ‘De Verdwenen Peerden’ (Stellingwarver Schrieversronte) is vraogd,en dan mit naeme om die prachtige, gigantische rok bestaonde uut meer as 14.000 lappies, nog ienkeer zien te laoten! Hi’j wodt, krek as op 3 en 4 augustus, dregen deur de smid uut et verhael (Geert Popkema van Noordwoolde). Ok een tal ni’jsters an de rok gaot naor de Grote Karke, en vanzels de bedaenker en ontwarper d’r van: artistiek leider Mariken Biegman!