Aktiviteiten

aktiviteiten

Laeste veurbereidings meziekfestival

door

11-7

Anna

Vandaege kwam de warkgroep Stellingwarfs Meziekfestival in Appelsche bi’j mekeer om de laeste punties veur 18 juli deur te nemen. Die dag is et Stellingwarfs Meziekfestival, orgeniseerd deur de Stellingwarver Schrieversronte, op ‘e Boerestreek in Appelsche. D’r wodt gebruuk maekt van de ni’je meziekkoepel, mar ok kefé-resteraant Oud-Duinenzathe is nauw bi’j et festival betrokken. Anna Span, o.e. pergrammemitwarkster bi’j de lekaole omroep Odrie, zorgt veur de prissentaossie en is d’r hielemaole klaor veur!

Overdag wodt een permosietoer veur et meziekfestival maekt mit een indrokwekkende DAF-truck. Op verschillende plakken wo’n mini-optredens verzorgd, deur o.e. Serge Epskamp. De truck van Jan Grootenboer van Oolde Pekel komt o.e. op de oolde ambachtemark bi’j museum Oolde Ark in Makkinge, op de streekmark van Berkoop en op de Roggeberg in Appelsche.

Et festival begint om goed vuuf ure mit een eupenings-optreden van Serge Epskamp. An et festival doen mit: et Combo Lammy Bruyns, de zanggroep ‘k Wait Nait, et duo Mirjam, de groep Pardouce en Spirit of the Dark. Et festival duurt tot 11 ure aovens.

Foto’s: Sietske Bloemhoff

Stellingwarfs meziekfestival op 18 juli

door

Lammy Bruyns

Ien van de dielnemers an et festival is et Lammy Bruyns Combo. Op ’e foto v.l.n.r: Janroelof Miedendorp de Bie, Arthur R. Siero, Lammy Bruyns-van Engen, Georg Lankester

Op zaoterdag 18 juli orgeniseert de Stellingwarver Schrieversronte veur et eerst een groot Stellingwarfs meziekfestival. Dit festival komt in de plak van Stellingwarfpop. De orgeniserende kemmissie van de Schrieversronte vun et tied wodden veur een hiele ni’je formule. Die kemmissie bestaot uut Klaasje Herder, Kjest Herder, Piet Tjassing en Sietske Bloemhoff. Ok troebadoer Serge Epskamp is bi’j de orgenisaosie betrokken. Et festival is vanof 17.00 ure op ’e Boerestreek in Appelsche.

Rondtoer overdag

Overdag wodt d’r  mit een speciaole DAF-truck deur verschillende dörpen toerd. Die rondtoer begint morgens om 11.00 ure in Appelsche en et bonte gezelschop trekt vervolgens deur de dörpen Oosterwoolde, Makkinge, Berkoop (streekmark), Noordwoolde, Buil, Else richting de kampeerplakken van Appelsche en Smilde. Tiedens de rondrit  wo’n mini-optredens verzorgd, mit o.e. Serge Epskamp en een verhaelevertelster!

IMG_3377 (2)

Tiedens de rondtoer is d’r ok op de streekmark van Berkoop een optreden van Serge Epskamp. Disse troebadoer uut Zaandhuzen eupent butendat et festival dat om 17.00 ure uut aende zetten zal.

Et festival

Et festival zels is vanof 17.00 ure op ien van de mooiste plakkies daorveur, en dat is de Boerestreek in Appelsche. D’r zal veur de verschillende optredens gebruuk maekt wodden van de ni’je meziekkoepel. Ok de omliggende horekabedrieven zullen bi’j et festival betrokken wodden, zodat et de 18e juli ien groot en gezellig feest wodden gaot op de Boerestreek! Et festival duurt  tot aovens 11 ure.

An et festival doen mit mekeer vier groepen en ien duo mit. Et gaot om et Lammy Bruyns Combo (mit Stellingwarver chansons en Gypsy swing), de Nedersaksische zanggroep ’k Wait nait, et West-Stellingwarver duo Mirjam, de groep Pardouce (mit o.e. musettes en tango`s) en de hardrockband Spirit of the dark. Disse band uut Else speult veural eigen Stellingwarver nommers.

Een deskundige jurt zal tegen 23.00 ure bekend maeken wie in heur ogen zorgd hebben veur de twie beste ni’je Stellingwarver lieties. De jury bestaot uut Philomène Bloemhoff (taelkundige), Serge Epskamp (meziekkenner) en Appie van Riezen (pergrammemaeker Odrie). Anslutend zullen de priezen uutrikt wodden.

De prissentaosie van et festival is in hanen van Odrie-mitwarkster Anna Span van Oosterwoolde.

 

 

 

 

 

 

 

Bridgen in Berkoop

door

bridge 15

Zaoterdag 13 juni ston Berkoop in et teken van de jaorlikse brigdedag. Die dag wodt orgeniseerd deur Hotel Resteraant Lunia, op verschillende plakken in et dörp wodt et spul speuld en op gezette tieden wodt d’r wisseld van lekaosie. Et gebouw van de Stellingwarver Schrieversronte is iene van die lekaosies, bestuurslid en ponghoolder Henk Koelma zorgde de hiele dag dat bi’j de SSR de bridgers op tied heur nattien en dreugien kriegen konnen. Op de foto van Lenus van der Broek zien jim behalven de bridgers ok de tentoonstelde Lendeschilderi’jen van Annie Ligthart van Oosterwoolde. Die schilderi’jen bin nog tot vri’jdag 26 juni tiedens kantooruren te zien.

Dippeteerde Sietske Poepjes lest veur uut Stellingwarver Tomke

door

Tomke, 1-6-15

Tomke, 3

(Foto’s: Lenus van der Broek)

Maendagmorgen 1 juni was in ukkespeulplak Meulewiek in Noordwoolde de eupening van de Friese Tomke-veurleesweke. Veur disse biezundere gebeurtenis was vrouw Sietske Poepjes, zi’j is de ni’je dippeteerde van kultuur, nuugd om daor uut et Stellingwarver Tomkeboekien veur te lezen. De kiender van et ukkespeulplak geneuten d’r ommeraek van, mar dat gul liekegoed ok veur de dippeteerde zels. Et Stellingwarfs gong heur trouwens ok mar poerbest of, vrouw Poepjes had daor dudelik goed op oefend.

Tiedens et welkomstwoord van Schrieversronte-veurzitter Ype Dijkstra dee mitien al blieken hoe belangriek mevrouw Poepjes de diversiteit an taelen in de perveensie vint: ‘Ienhiedswost daor vien ik niks an; al die verschillende taelen in oonze perveensie bin toch prachtig!’ Ok et belang van disse gezaemelike aktie van Afûk,  it Selskip foar Fryske Schriftekennisse en de Schrieversronte onderstreepte ze. ‘En ik wil d’r mit veur zorgen dat tiedens 2018, et jaor dat Liwwadden kulturele heufdstad is, de streektaelen dan ok goed heur gerak kriegen, ok et Stellingwarfs,’ zo leut de dippeteerde weten. ‘Dat jaor zal et, as et an mi’j ligt, niet alliend om Liwwadden gaon, mar om de hiele perveensie.’

Sietske Poepjes heur reaktie

Vrouw Poepjes: ‘Al die verschillende taelen in oonze perveensie bin toch prachtig!’ (Foto: Tineke van der Woude) 

Bi’j de eupening van de veurleesweke weren ok vertegenwoordigers van de Afûk en It Selskip foar Fryske Schriftekennisse. Geeske Frieswijk, zi’j is veurzitter van de veurleeskemmissie van It Selskip, gaf an dat disse veurleesaktie et levende bewies is van levende taelen en hoe riek Frieslaand daor an is. ‘En in de Stellingwarven bin we dubbel riek, want daor gaot et niet om een streek, mar om twie gemienten mar liefst. In beide gemienten kommen daordeur jaorliks zoe’n 600 ukken in de kunde mit heur eigen tael. Wat moe’n de beide gemientebesturen hier bliede mit wezen, wat een riekdom ok veur heur!’

Nao et veurlezen wodde schriefster Sjoukje Oosterloo, zi’j vertaelt al sund jaor en dag et Tomkeboekien vanuut et Fries in et Stellingwarfs, mit een bos bloemen in et zunnegien zet. Ok veur vrouw Poepjes was d’r as daank veur heur eerste officiële haandeling in Stellingwarf as ni’je dippeteerde van kultuur bloemen, mar ok de ni’je jaordagkelender van Tomke. Vrouw Poepjes beloofde gauw es weer naor de Stellingwarvern toe te kommen, et hadde heur ommeraek goed voldaon.

Kultuurdippeteerde Sietske Poepjes eupent veurleesweke Tomke in Noordwoolde

door

Kommende maendagmorgen 1 juni is de eupening van de Tomke-veurleesweke in ukkespeulplak Meulewiek in Noordwoolde. De eupening zal gebeuren deur kultuurdippeteerde Sietske Poepjes. Zi’j zal daorveur een verhaeltien veurlezen uut et ni’jste Tomkeboekien Hoj Tomke. Et is veur et eerst dat disse biezundere veurleesweke, die sund jaor en dag in de hiele perveensie Frieslaand holen wodt, in Stellingwarf uut aende gaot.

De Tomke-veurleesweke is een initiatief van  It Selskip foar Fryske schriftekennisse. Dit zelschop het deur de hiele perveensie henne overal vri’jwillige mitwarkers zitten die de weke in heur dörp of regio orgeniseren. In de Stellingwarven gebeurt dat al sund jaor en dag deur twie vri’jwilligers van de Stellingwarver Schrieversronte, dat bin Akkie Zeilstra veur Oostaende en Wikje Haan veur Westaende.

Et boekien Tomke mit daorin de aeventuren van et joongien Tomke, zien kammeraotien Romke et hontien en Kornelia de kangeroe verschient dit jaor veur de 19e keer. Et wodt uutgeven deur de Afûk en komt behalven in et Fries en et Stellingwarfs o.e. ok uut in et Bildts en dit jaor veur et eerst in et Schiermonnikoogs. Veur de Stellingwarver ukken wodt Tomke vanuut et Fries in et Stellingwarfs vertaeld deur Sjoukje Oosterloo. De Stellingwarver Schrieversronte stelt veur alle ukken een boekien beschikber.

De feestelike eupening wodt bi’jwoond deur vertegenwoordigers van It selskip foar Fryske schriftekennisse, de Afûk en de Schrieversronte.