Aktiviteiten – Pagina 26 – StellingPlus.nl

Sutelaktie 2016 is begonnen!

30 augustus 2016 door Redaktie

Twiede Kaemerlid Lutz Jacobi en oold-veurzitter SSR Ype Dijkstra deden goeie zaeken op ’e Haule

Mit prachtig zommers weer gong maendagmiddag op ’e Haule en in Donkerbroek de jaorlikse sutelaktie van de Stellingwarver Schrieversronte uut aende. Zoe’n twintig vri’jwilligers tuugden nao de eupening in Berkoop de diek uut mit o.e. de Stellingwarver Spreukekelender van 2017, twie ni’je routegidsen (deur et stroomgebied van De Lende) en et splinterni’je boek ’Sprokies van Grimm in ’t Stellingwarfs’.

Veurzitter Jan Baas gaf in zien welkomstwoord an weer op een slim goeie verkoop te hopen, mar ston eerst even stille bi’j et zo haostig uut de tied raeken van Geert van der Meulen. Oold-bestuurslid Van der Meulen hulp eerder jaorenlaank mit an de orgenisaosie van de aktie, en sutelde butendat elk jaor in zien woonplak Oosterwoolde.

Henk Veen (82) eupende de 42e sutelaktie

Tredisiegetrouw wodde de sutelaktie eupend deur et geven van een galp op de speciaole suteltoeter. Dit keer was die ere veur Henk Veen van Oosterwoolde, die mit zien 82 jaor iene van de ooldste sutelders is.

De sutelders bin ok woensdag 31 augustus en maendag 5 september in Stellingwarf-Oostaende. Ze kommen dan o.e. in Appelsche, De Fochtel, Else en Oosterwoolde. Vanof woensdag 7 september is de aktie in Westaende.

Koosje Hornstra, Sientje Hogeling en Ineke Oudshoorn zorgden veur lekkere broties veur de sutelders.

Foto’s: Lenus v.d. Broek

Sutelaktie begint op 29 augustus

28 augustus 201621 augustus 2016 door Redaktie

De sutelders te gaaste bi’j Lutz Jacobi in Den Haag (Foto: Lenus van der Broek)

Sutelaktie SSR begint 29 augustus

Berkoop. Ankem maendag 29 augustus begint in de dörpen De Haule en Donkerbroek de jaorlikse sutelaktie van de Stellingwarver Schrieversronte. Tiedens die aktie wo’n mit naeme de ni’jste boekuutgiften van de stichting huus an huus te koop anbeuden. Zoe’n 75 vri’jwilligers zorgen d’r alle jaoren weer opni’j veur dat veul meensken ok op disse wieze in de kunde kommen mit de Stellingwarver streektael en streekkultuur. Behalven boeken ligt d’r in de sutelkrojen ok ere negosie, zoas cd’s, de Stellingwarver Spreukekelender en et Stellingwarver tiedschrift De Ovend. De sutelders bin ok woensdag 31 augustus en maendag 5 september in Stellingwarf-Oostaende. Ze kommen dan o.e. in Appelsche, De Fochtel, Else en Oosterwoolde. Vanof woensdag 7 september is de aktie in Westaende.

Kraompien in de grotere dörpem

Ni’j is dit jaor een vaast verkooppunt in de grotere dörpen daor suteld wodt. Dat punt is te herkennen an een opvalende vlagge; meensken kun ok bi’j dat verkooppunt Stellingwarver boeken kopen of bestellen. In september wo’n bestellings ommenocht thuus bezorgd.

Lutz Jacobi opni’j van de perti’j

Veurig jaor dee Twiede Kaemerlid Lutz Jacobi veur et eerst mit an de Stellingwarver sutelaktie. Dat voldee heur zo best dat ze alle sutelders nuugde om een daggien naor de Twiede Kaemer in Den Haag te kommen. Et wodde een prachtige dag, die bi’j iederiene ommeraek in de smaek vul. Omreden Jacobi veul belang hecht an et in levend gebruuk blieven van de kleinere taelen, dot ze ok dit jaor weer mit an de sutelaktie. Op maendag 29 augustus gaot ze de streek op mit oold SSR-veurzitter Ype Dijkstra.

Stellingwarfs Meziekfestival op 12 november in De Miente

25 februari 202021 juli 2016 door Redaktie

Ok de Scheve Schaats Band uut Wolvege dot mit an et Stellingwarfs Meziekfestuival op 12 november. (Foto: Sietske Bloemhoff)

Eerder was d’r spraoke van dat et Stellingwarfs Meziekfestival op zaoterdag 23 juli holen wodden zol. Mar omreden veul meensken dan op vekaansie binnen, weren d’r veur et festival niet genoeg dielnemers, en is et uutsteld naor zaoterdag 12 november. Et festival is dan ok niet op ’e Boerestreek in Appelsche, mar in et aktiviteitencentrum De Miente in Oosterwoolde. Ok de lekaole omroep Odrie is betrokken bi’j de orgenisaosie en zal et festival live uutzenden. Omroep Odrie het zien studio in et veurhuus van De Miente.

Ie kun je nog opgeven

Iederiene die meziek maekt in et Stellingwarfs kan an et festival mitdoen. Dat gelt dus veur duo’s, troebadoers, koren, bands, rappers en gao mar deur! Daorbi’j hoeft ok niet et hiele optreden uut Stellingwarver lieties te bestaon, mar mooi is zoks netuurlik wel!

D’r kan butendat mitdaon wodden an de wedstried veur et beste en meerst originele Stellingwarver lied. Daorbi’j moe’n de tekst en de meziek dan wel origineel wezen. Veur et in de ogen van de jury beste lied is een mooie geldpries beschikber steld. Veur anmelding of meer infermaosie kuj’ et beste even een mail sturen naor de Stellingwarver Schrieversronte, et mailadres is info@stellingwarfs.nl.

Et doel is dat et festival volgend jaor wél weer op ’e Boerestreek in Appelsche holen wodt. Dat zal dan wezen op 27 augustus, dat is op ’e aovend van de laeste dag van de Fietsvierdaegse van Appelsche. De orgenisaosie is dan ok weer in saemenwarking mit SA3 (Stichting Algemiene Aktiviteiten Appelsche).

Netuurexkursie veur kiender in Else

16 juni 201616 juni 2016 door Redaktie

Woensdagmorgen 16 juni trok netuurexkursieleider Andries van der Veen van Wolvege d’r op uut mit een groep kiender van de schoele van Else. Dat gebeurde opni’j in et kader van et projekt Netuurexkursies t.b.v. et vak Hiemkunde in et basisonderwies. De orgenisaosie daorvan is in hanen van een speciaole warkgroep van de Stellingwarver Schrieversronte, waor Van der Veen ok diel van uutmaekt.

De exkursie was in et prachtige netuurgebied bi’j et Kannedemeer. Op ’e foto’s is liekewel te zien dat Van der Veen ok evenpies mit de leerlingen et meer ingong… In et gebied is ommeraek veul biezunders te zien wat et veurkommen van biezundere plaanten en dieren angaot. Mar ok over de gewone braandnettel vertelt Van der Veen de kiender. Hi’j lat zien hoe aj’ hielemaole gien last van prikkelderi’je hoeven te hebben aj’ de plaante vaastepakken. Aj’ dat mar op de juuste wieze doen! En doej’ et tóch verkeerd: vlakbi’j braandnettels gruuit haost altied wel hondsdraf. Aj’ mit blatties daorvan over de prikkelende huud wrieven is et zo weer over, neffens Van der Veen.

Van der Veen is riegelmaotig as exkursieleider de netuur in, zo verzorgt hi’j behalven veur de Schrieversronte ok exkursies veur Staotsbosbeheer.

Foto’s: Lenus v.d. Broek

Dat hej’ goed daon, Tomke

6 juni 2016 door Redaktie

Albertha Zwaagstra lest veur uut et ni’jste Tomke-boekien in ukkespeulplak ‘Voor dag en dou’ in Appelsche (foto: Lenus van der Broek)

In de eerste volle weke van juni is et op ukkegebied in de hiele perveensie een drokte van belang! Die weke wodt d’r sund jaor en dag de grote veurleesaktie holen in veerweg de meerste ukkespeulplakken en plakken veur kienderopvang. Ok in zowat alle Stellingwarver dörpen bin die weke veurleesvri’jwilligers in de weer om de kiender in de kunde te brengen mit de prachtige verhaelties over et joongien Tomke en zien kammeraoties Romke et hontien en de kangeroe Kornelia.

In hiel Frieslaand wodt d’r in meerdere taelen veurlezen, mar veural in et Stellingwarfs en et Fries. De veurleesaktie wodt orgeniseerd deur et ‘Selskip foar Fryske tael en schriftekennisse’. In de Stellingwarven verzorgen zoe’n twintig vri’jwilligers van de Stellingwarver Schrieversronte de aktie, de koördinaosie d’r van is in hanen van Akkie Zeilstra en Wikje Haan.

Et ni’je Tomke-boekien ‘Dat hej’ goed daon, Tomke’ is een uutgifte van de Afûk in Liwwadden en wodde in et Stellingwarfs vertaeld deur Sjoukje Oosterloo. De Stellingwarver Schrieversronte stelt alle jaoren veur alle Stellingwarver ukken een exemplaor van et boekien beschikber.